Storiis di une volte...

Centri “Lidrîs Furlanis”

2011-12-10T06:14:00.000-08:00

...

Us informin che a partî dal dì di vuê cheste pagjine e vignarà publicade in:

www.centroraicesfriulanas.blogspot.com

Le cjatarês te Etichete: "Storiutis Furlanis"

A riviodisi.

...

Mût di dî

2011-12-05T14:34:00.000-08:00

---

L’om al è fûc e la femine e je paie.

Il diaul e il vint ai soflin parsore.

---

Scjatulutis

2011-10-16T14:02:00.000-07:00

O colezioni scjatulutis. Scjatulutis smaltadis, scjatulutis di len piturât, scjatulutis di cristal, metal, carton e di perle, dutis piçulutis.

In chês scjatulutis o conservi tocuts di felicitât. Parcè che la felicitât no je ornament di paret, sino un zugatul fat di piçulis parts, che si metin adun poc a poc. E che no à une figure stabil, preconcete, ma variis figuris, che a mudin e che a puedin cambià a secont dai dîs, des oris o dai puescj.

Tu, tu mi âs insegnât chel. E tantis di chestis scjatulutis a àn parts tôs. No…No lu ai imparât subit…al à volût il so timp…Cuant che la tô vite si je distudade, la pôre e la solitudin a faserin grops tes mes visaris. O batevi in dutis lis puartis cun terôr di no sei sintude, di no sei ricevude. E mi zuravi, ogni dì, bati altris puartis e altris e altris, cence impuartâmi cui che lis varès viertis, cui saressial bon di sintì il sun di une cjampane al vint, che al emeteve il gno cûr…Une cjampane di nâf tal mieç dal ocean, une cjampane di catedrâl tal mieç dal desert, une cjampane jesolant cun suns di pene e di risultive al stes timp…

Fintant che o scomençai a vierzi lis scjatulutis. Intune o cjatai un fulminant, un di chei che tu, tu mi impiavis i spagnolets, ancje se cuasi no fumi o ai impiât un, tratant di fâ cerclis di fum, come che tu ju fasevis tu.

In tun’altre o ai cjatât tiere incoloride dal nord, di Purmamarca, il nord i à puartât pas e colôr al sud de mê agjitazion, cun la sô plaçute cui vendidôrs di presepiuts, l’aiar di celestiâl trasparence e lis sôs montagnis tarondis…Ta chê di porcelane, une rose secje e un bilietut pleât: “cuint aniversari”.

Ta chê di arint, une medaie benedete de madone di Lujan. Rene de splaze cuiete, un carantan di “austrâl”, un ros coral african, une jentrade di cine, un biliet dal bus urban, un anelut che al veve pierdût la pierute, un cuarç cuasi dorât, une plumute di colibrì…Ducj itineraris di stradis cjaminadis insiemi e che jo o torni a falis puartant i tiei pas parsore dai miei, cumò che i tiei pas no pesin nuie, issint fats di pûr aiar, di a pene un svolaç di pavee, di a pene une lagrime…

¿Viodistu? Bielzà no bat puartis, dome o vierç lis scjatulutis par no sintîmi tant sole. Però, chest si, al stes timp, o vierç ancje il gno cûr.

Conte di Poldy Bird scritore Argjentine che scrîf partint dai sintiments.

Le à tradote al furlan: Galliano Remo De Agostini

---

Storiis di spirts

2011-09-23T07:58:00.000-07:00

I doi spirts, un blu e chel altri blanc, si cjatarin devant de solite caverne. Si saludarin in sordine e a cjaminarin un biel toc, cence talpassâsi i bleons, ognidun pierdût tai soi pinsîrs. E jere une gnot fumatose, no si calumave ni morârs ni mûrs, però là sù parsore, unevore adalt si viodeve la lune.

- Ce curiôs – al disè di corse il spirt blanc, - al è curiôs cemût che il cuarp za no si vise dal passât, cuant che si ricuardave al jere par sofrî.

- ¿Âstu sufiert tant? – ai domande il spirt blu. –

- Avonde, fin cuant che lu ai pierdût di viste il gno cuarp – al rispuindè. Al veve brusaduris di spagnolets su la schene, ai mancjavin trê dincj che ai forin gjavâts cence anestesie. No si jere smenteât, cuant che ai metevin il cjâf tun seglot plen di escrements e urine, ma particolarmentri ogni tant si cjalave i soi testicui.

- Oh – e je stade la uniche silabe che al pronunzià, o al pensà, o al suspirà il spirt blu.

- ¿E tu? – al domandà a sô volte il spirt blanc. - ¿Ancje il to cuarp ti trasmetevijal patiments?-

- No tant il gno cuarp, ma ben si chel dai altris -.

- Dai altris? Sêstu forsit miedi? –

- No propit. Jo o jeri il boie –

Il spirt blanc al ricuardà che là parsore, unevore adalt e jere la lune. Le cjalà dome parcè che al veve bisugne di inceâsi. Però la lune no je il soreli.

Cuntune ponte dal bleon cence maglis si suià une lagrime di odi. Podopo si slontanà vongolânt te fumate protetive, ae ricercje di un Diu.

O di nuie.

---

Cjapitul rigjavât dal “Fâr e altris ombrenis” di Mario Benedetti, scritôr Uruguayan.

La traduzion al furlan e je di Galliano De Agostini.

---

¿Vivi bessôi ise une sielte o une imposizion?

2011-07-28T18:31:00.000-07:00

   Lis personis no cubiadis a son un grup demografic in cressite tal mont ocidentâl. A Buenos Aires tra no maridats, separâts, divorziâts o vedui, si calcole la metât de popolazion cirche.
  ----
Seont studis, cuatri su dîs, tra 25 e 65 agns a declarin sei “discubiâts”, ancje ricognossint che a podaressin cambiâ di categorie se cjatassin la persone juste.
    L’aument dai no sposats si lu relazione cun la instabilitât des unions. Il posponi tra i zovins il prin compromès, la traietorie su la autonomie des feminis, lis lôr consistentis richiestis tal cjatâ un gnûf "partner".
   ----
    Chest cambi al altere lis formis des relazions, significant che la gran part al travierse un periodi de sô vite adulte, sedi par sielte o par imposizion, cence rivâ a formâ nissun leam seri.
----
    Par tancj di lôr il no sposâsi al è sinonim di intimitât e libertât individuâl, concedint une centralitât tai risultâts professionâi, saldant dai leams cun amîs e fîs, favorint une intense vite sociâl. Altris a àn la sensazion di sei isolâts, un fenomen des grandis citâts, dulà che la socialitât dai altris e je plui visibile, che po provocâ une dolorose cjalade in chei che si sintin bessôi. I umans o sin individuis integrats e socievui.
----
    Studiis sientifics a mostrin che la gran part des personis no puedin vivi a plen, cence vê par dongje dai afiets, cui cuai podè interagjî. A mostravin ancje che i contats sociâi cun rets di grandis dimensions, dispès e aumente la sensazion di ben stâ. Tes grandis citâts, la metât cirche des personis a vivin solis, che a vedin o no une cubie, ognidun a cjase sô.
   ----
    Ciertis carateristichis de vite moderne a aumentin lis sensazions di solitudin: i spazis publics a àn lassât di sei sîts di incuintri; alts nivei di sfiducie interpersonâl a son privativis di ambients cun grandis disparitâts sociâls e ancje lis gnovis tecnologjiis spes a rinfuarcin l’isolament.
   Se lis relazions di cubie a son efimaris, ¿i leams sociâi si slaçarano o si trasformarano tal timp?
  ----
Rigjavât da un articul di un cuotidian. Galliano lu a sintetizât e tradot al furlan.
----

Il purcitut

2011-07-12T03:13:00.000-07:00

La siore e jere simpri vistide di neri e strissinave ridint i reumatics dal dormitori ae sale. Altris abitazions a no'nd jere; chel si, un barcon che al dave suntun piçul zardin brun. E cjalà l’orloi che al pendolave dal so pet, e pensà che al mancjave oltri une ore ae vignude dai fruts. No jerin siei. A voltis doi, a voltis trê che rivavin des cjasis in ruvine, passant la plaçute, traviersant il puint di bree sore il fossâl cumò sec, infuriadis lis aghis tai temporâi d’Invier.

Ancje se i fruts a scomençarin a là ae scuele, e rivavin simpri a scjampâ des lôr cjasis e aulis, te ore de pegrece e dal pisul. Ducj i doi o i trê; a jerin sporcs, plens di fan e fisichementri diviers. La anziane e rivave simpri a ricognossi in lôr cualchi carateristiche dal nevôt pierdût; a voltis a Zuan ai corispuindevin i voi o la francjece dai voi e de bocje tal ridi; altris, lis cjatave in Milio o Guido. Nol passave nissun dopo misdì cence che si ves riprodot cualchi segn, cualchi mot dal nevôt.

E pasà cence premure ae cusine par preparâ lis trê scudielis di cafelat e lis fritulis che involuçavin miluçs codogns.

Chel dopomisdì i fruts no sunarin il campanel dal puarton, ma batiint cun lis aìnis il cristal de puarte de jentrade, la anziane e à tardât a sintiju, i colps a continuarin insistents, cence aumentà la lôr fuarce. Al finâl, e je passade ae sale par comodâ la taule, la vecje e sintì il rumôr e viodè lis trê figuris che vevin za fât lis scjalis.

Sentàs ator de taule, cui smursiei sglonfs de dolcece dai pasticins, i fruts a ripeterin lis stessis monadis, si acusarin fra di lôr dai fracàs e tradiments. La anziane no ju capive e ju cjalave mangjâ e veve un ridi imobil; e decidè che Milio i faseve ricuardâ al nevôt plui di chei doi altris. Sore dut cui moviments des mans.

Intant che lavave lis scudielis in cusine e sintì il cor des ridadis, il rumôr di vôs cidinadis dal segret, po dopo il cidinôr. Cualchidun dal cjaminâ cautelôs si svicinave, je no podè sintì il rumôr sort dal fier tal cjâf. No a sintût plui altri, brancolant e colà par tiere, restant cuietute sul paviment de sô cusine.

A ciririn in ducj i mobii de cjamare, sot il materàs. Dividintsi i biliets di bancje e lis palanchis. Zuan ai disè a Milio: - Dai un altri colp, no si sa mai.

A cjaminarin a planc sot i rais dal soreli, rivâts al breon dal fossalon, ogni un al tornà par separât al cuartîr miserabil, ogni un tal so cjasot, Guido, cjatantsi tal so, vueit come simpri tai daspò misdì, al alçà sù, dai vistîts, dai rotams, des scovacis, da un casetin che al veve dongje il so jet, tirant fûr une musine blancje e maglade al metè dentri la cjarte monede e lis palanchis, une musine in zes a forme di purcit cuntune fressure su la schene.

---

Une conte di: Juan Carlos Onetti scritôr Uruguayan (Montevideo 1909, Madrid 1994)

---

La traduzion al furlan e je di Galliano De Agostini
---

Il zûc dal truc

2011-06-18T13:02:00.000-07:00

Mi plâs ricuardâ il rapuart che o vevi di piçule cui miei cusins. A son stâts i miei prins amîs e cui zûcs i prins rapuarts. Ma ‘nd jere un in particolâr che al jere dome nestri… e parcè? Par sei chel che a zuiavin i nestris paris in Friûl. Si clamave il “Zûc dal truc”, si lu zuiave il dì di Pasche. Issint une tradizion che si trasmeteve di gjenerazions, nus tocjave a nô imparâlu!

I preparatîfs a scomençavin une setemane prime. Si pensave al mangjâ, ma ancje a preparâ il “Truc”!

I ûfs a jerin i elements di chest zûc. Par chel, si sielzevin i plui biei, par dopo piturâju o trucâju, une tradizion cussì impuartant che unive dute la famee.

Me mari, Albe mi a insegnât a preparâju come che ju faseve me none Catarine, a Cividât. Il câs al jere che nô cusins a vevin vût la stesse none! Alore bisugnave ve un tic di creativitât… par che non fossin ducj compagns.

Par esempli, ju involuçavin cun scusis di cevole, une parsore di che altre, par no lassà nuie blanc, e si tornavin a voluçâ cun peçots di coton, e si ju leave strents cuntun spali, po dopo si metevin a boli. Une altre pussibilitât e jere che di meti tal mieç des scusis, fueis di savôrs. L’efiet al jere maraveôs, a someavin di marmul cu lis fueutis stampadis atôr. In tant par piturâju si dovevin fâju bulì prime. Za frêts si fasevin i dissens di pasche: rosutis, i nons dai zuiadôrs, ecc. E cundut ce che si veve in cjase si ju colorave.

Le metevin dute par fa i ûfs plui biei… i plui origjinâi.

La sabide di pasche, mio barbe Guerino, al preparave il teren dal zûc, che al vignive fât cul savalon. Come che lui al lavorave te costruzion, ‘nd veve une vore di rene. Mio pari Aldo al leve a dai une manute, cetant lavôr che ur dave!

Il cumul al jere cuasi taront, e al veve doi ponts di partence, par dulà che i zuiadôrs e tiravin i ûfs. In chel pont al veve une altece di cirche un metri e dopo al leve jù di colp.

Ce tantis ridadis cuant che i ûfs si sdrondenavin un cun altri! Cussì al vinceve chel che ai restave l’ûf plui intîr

Ducj a zuiavin, i piçui e i vecjos. Ce tante ligrie! Ce tante nostalgjie dai paris, tornà a zuià come cuant che o jerin fruts.

E dopo di vê rots tancj di chei ûfs, cetantis ridadis. Si leve a mangjâ la gubane e i ûfs di pasche cussì ben meretâts.

---

A son ricuarts di Catalina (Lina) Maria De Faccio

---

Magjie

2011-05-31T09:03:00.000-07:00

Il mago Rizzuto nol cognosseve nissun truc. La sô presentazion e jere une vore semplice: al bateve sul cjapiel cu la sô bachete blu, po dopo al spietave che aparissi une colombe.

Naturalmentri, la totâl mancjance di doplis fonts, di maniis ospitâls e di zucs di mans, lu conduseve simpri al stes aviliment. La colombe no comparive.

Rizzuto, dal solit si presentave in teatris modescj, o in festivai di paîs, di dulà che, cuasi simpri lu paravin vie a pidadis.

La veretât che lui al crodeve te magjie, te vere magjie. In ogni presentazion, in ogni colp che al dave cu la sô bachete blu, e jere simpri la vivarose sperance di un miracul. Lui nol si contentave dome cun lis tecnichis dal ingjan. Al voleve che la colombe e comparissi in maniere clare.

Dulinvie tal timp lu à compagnât la delusion e lis siviladis, cualsisei altri al varès bandonât la lote. Ma Rizzuto al jere fiduciôs.

Une sere si presente tal club Fénix. Altris magos a lu vevin precedût. Cuant che al rivà il so turni, al de il so classic colp cu la bachete blu. E dal font dal cjapiel e salte fûr une colombe, une colombe blancje che svolant viers un barcon, si je pierdude tal scûr de gnot. Al à ricevût a penis cualchi batiman.

La int e preferis une art fate di trucs scjassôs ai miracui pûrs.

Rizzuto nol tornà ai senaris. Forsit al va indenant fasint aparî la colombe in forme particolâr.
---
La traduzion al furlan e je di Galliano De Agostini
---

Conte di: Alejandro Dolina, scritôr, music e condutôr di radio e di televisión.

---

I dits da la none

2011-05-16T09:52:00.000-07:00

Puare none. E veve passade tante miserie a Bertiûl, il paisut dulà che viveve, che no podeve comprasi nuie che no fos stade une necessitât. Rivade a Buenos Aires, dulà che ancje li no jere tante bondance, però si stave un pôc miôr.

E veve simpri te sachete dal grumâl, platade cualchi robe dolce. A i pareve di fâ pecjât se mangjave alc difûr dal past. Alore par justificâ e diseve une volte che veve la bocje sute; une altre volte che veve la bocje mare, o la lenghe sporcje, o che veve di comedâsi il stomi.

Tantis detulis da la none mi compagnin dì par dì, cumò che o soi viele ancje jo.

----------------------------------

Los dichos de mi abuela

Pobre abuela: Había pasado tanta miseria en Bertiolo, el pueblito adonde vivía, que no podía comprarse nada que no fuera una necesidad. Al llegar a Buenos Aires, donde también aquí no abundaban las cosas, pero eso si, se estaba algo mejor.

Tenia siempre en el bolsillo del delantal escondido alguna cosa dulce. Le parecía que estaba pecando si comía algo afuera de las comidas. Entonces para justificar decía una vez que tenia la boca seca, otra vez que tenia la boca amarga, o la lengua sucia, o que tenia que acomodarse el estomago.

Tantos dichos de mi abuela me acompañan todos los días ahora que también yo soy mayor .

-----------------

Colaboracion de Alice Rivoldini, alumna del "Taller de furlan" de la Sociedad Friulana de Buenos Aires.

...

Vincul di famee

2011-05-04T07:26:00.000-07:00

A odein in tune tal maniere ae agne Angustie, che a profitin parfin des feriis par fâjal savè. A penis che la famee e partîs pes vacancis viers diferents ponts turistics, ai scomencin a rivai un diluvi di cartulinis postâls a colôrs e ancje in blanc e neri par mancjance di altris, però dutis cence ecezions a son cuviertis di insults.

ººº

A rivin di Rosari, di Sant Dree di Giles, di Chivilcoy e di Chacabuco, cinc o sîs voltis al dì i puestins ai consegnin la pueste di malevoie, la gnagne Angustie e je feliç e contente.

Je no jes mai di cjase sô, i plâs sentâsi tal curtîl, passant lis zornadis e riceviint lis cartulinis postâls, apaiade e contente.

ººº

Lis cartulinis a disin: “Mandi cragnose, che un folc ti trai, Gustâf”."Une spudade,tô gnece Bepina”. “Che il gjat ti pissi sui malvons,cussì si suin, tô sûr”. E cussì di file e, di ducj i colôrs..

La Agne Angustie e jeve adore par ricevi i puestins dantjur la buine man. E lei lis cartulinis amirânt lis fotografiis e tornânt a lei i saluts.

ººº

Di gnot e tire fûr l’album dai ricuarts, colocantlis cun tante cure, di maniere che si puedi viodi la panoramiche ma ancje lis firmis.

- Puars agnui, cetantis cartulinis che mi mandin - e pense la gnagne Angustie,

- Cheste cu la vacjute, cheste cu la glesie, ca il lât Traful, ca il ram des rosis - cjalantlis une ad une cun tenarece e impirant une gusiele in ogni cartuline, nol sedi che si pierdin, ancje se, e chest bisugne dilu, la gusiele le pontave simpri su lis firmis, dome je e saveve parcè.

ºººº

Julio Cortázar, scritôr Argjentin tai gjenars dal fantastic, de metafisiche e dal misteri. Lis sôs contis no simpri a àn une linearitât temporâl, però i personaçs a esprimin simpri une profonde psicologjie.

La traduzion al furlan e je di Galliano De Agostini

ºººº

La puarte

2011-04-15T17:42:00.000-07:00

"A Carlo, che daspò di cheste storie, bielzà in plene democrazie, al tornà in preson, acusât dal delit di sei periodist."
----

Intun cjasot di robis vecjis, par pure casualitât, Carlo Fasano al cjatà la puarte de cele dulà che al jere stât presonîr. Dulinvie la ditature militâr Uruguayane, lui al veve passât sîs agns fevelant cuntun surisin e cun chê puarte de cele numar 282. Il surisin al leve e al tornave cuant che al voleve, ma la puarte e jere simpri li. Carlo le cognosseve miôr che la palme de so man. Apene che le à viodude, al à ricognossût i tais che lui al veve fat cuntune sedon e lis maglis, lis vecjis maglis dal len, che a jerin lis mapis dai paîs indulà che lui al veve viazât tal cors di ogni zornade di preson.

----

Che puarte e dutis lis puartis di chês altris celis a son finidis tal cjasot, che lis veve compradis, cuant che la preson e je deventade un “shopping center”. Il centri di detenzion al è passât a sei un centri di consum, za non veve presonîrs, ma ben vistîts di Armani, profums di Dior e videos Panasonic.

----

Cuant che Carlo al à scuviert la so puarte, lui al decidè di comprâle, Però lis puartis des celis a jerin deventadis di mode a Punta del Este, il paron de buteghe al domandave presis impussibii. Carlo al discutè sul valôr fin in font e cun l’aiut di amîs, al à podût paiâle. Vint bisugne di plui di un musculôs par traspuartâ chê masse di len e fier, inespugnabil ai agns e aes fuidis. Le puartarin fin ae cjase di Carlo tun puest clamât “Cuchilla Pereyra”.

----

Alì si cjate cumò la puarte. E je blocade su la cime di une culine e contornade cun tant vert e di face al soreli.

Ogni dì a buinore la sô lus le lumine, su la puarte al è un cartel che al dîs: Al è proibît sierâle.

------

La à scrite Eduardo Galeano, periodist e scritôr Uruguayan.

La traduzion e je di Galliano De Agostini.

------

La lune

2011-04-05T13:06:00.000-07:00

O pensi che ognidun di nô, cuant che la sere al cjale il cîl, al vedi osservât la lune e la sô luminositât, fantasticânt su di je, su di chel che plate di inmagant,e chel che nus lasse intindi cun lis sôs liendis misteriosis.

Tal cors dai agns fasint lis propris esperiencis, l’om si è inacuart che i moviments costants de lune e dal soreli a condizionavin la nature, i oms e i animâi cun intervai regolârs, tant di rivâ a capî il sucès o mancul di une racuelte o altri.

Dopo che mont al è mont, i contadins a san cemût che la lune e po influî su lis plantis, (e san ben cuant che àn di cuinçâ o mancul) sul fasi i cjavei, su lis aghis causant mareis e ancje facilitânt lis nassitis. Ancje se no esist evidence sientifiche che confermi chestis credincis.

I ciclis lunârs a àn diferentis fasis:

- Lune gnove o lune nere.

- Zovin di lune: lune che cres - prin cuart.

- Lune plene: lune iluminade dal dut.

- Vecjo di lune: lune che cale - ultin cuart.

La lune e jere fondamentâl tal setôr agricul, no si alçave fuee prin di scrutinâle par ben. Al jere di rigôr fâ in lune plene: il seâ i cjamps e i prâts, rispietant cheste fase, si garantive al fen di mantignî la sô fragrance, che leve oltri il mês di Mai; tal fâ lens tai boscs, cussì la plante no tratignive l’aghe al’interni dal tronc, favorint la combustion.

Il stravasâ dal vin tes cantinis al avignive tes zornadis cence aiar, par che no si inasprìs e nol restàs turbit. Se si lu voleve otignîlu becantin, si lu travasave tal prin cuart di zovin di lune.

Vuê i timps a son cambiats, si dispon di gnovis tecnologjiis, che cul passâ dal timp a àn cjapât il puest des antighis usancis, cun dut achel, lis tieris di grande vocazion agricule e vegnin ancjemò tignudis in considerazion, issint usancis che a àn cjapât pît in tante int, che ancjemò a vivin in contat cu la nature, puartant indevant il so ritmi.

---------------------------------------------

Ancje in cheste ocasión al à colaborât Giuseppe Miconi un gno amì.

-------

" Il cjanton di Anute e la sô “purcite ”

2011-03-28T14:56:00.000-07:00

    Al jere il miôr moros, un zovin bon come il pan, si inzegnave a fa di dut. Il prin regâl che mi veve fat, je stade une gurlete par filâ, cul sô non sculpît parsore, un artist in brut, pecjât che nol à studiat.
    ----
Me mari i voleve tant ben, disint che al saveve fai il bec a une moscje, al leve dut ben, o jerin contents nô e ancje lis fameis…purtrop il diaul al à metût la code, e mê cusine la lenghe.
   Cheste e scomençâ a metimi spinis tal cûr, forsit cun buinis intenzions (jo le tignivi come une sûr), mi diseve che al veve un’altre, che mi tradive, jo cence esperience i crodei a chês cjacaris veris o infamis, l’orgoi dai miei disevot agns al taià la relazion cence pensai.
  ----
E dopo agnorums o pensi che il nestri destin al jere chel. Sigurementri le stât un fal di zoventût…di crodi a cjacaris, paiadis cun tantis lagrimis.
----
   Baste di malinconie, us contarai cemût che je lade cheste storie…in paîs in chei timps, cuant che doi si lassavin, i amis dal moros, vie pe gnot a fasevin la “purcite”, spandint cinise (o altri)tun colegament tra lis cjasis dai doi morôs, tal doman lis babis a varessin vût motîf par cjacaronâ.
----
    Devant cjase e jere la latarie sociâl, gno pari al jere il casaro, le vierzevin a 7 di buinore, mê mari si alçave par molzi la vacje.
   Jessint de puarte di cjase si çopede tun grum di cinise, “mangjant subit la fuee” e capì l’antifone, mandant cu la scove la cinise devant de puarte de latarie, cussì lis babis, che levin a puartâ il lat, si saressin rotis il cjâf pensant di cui che jere chê “purcite”, saraie par chê, par chê altre, o pe fie dal casaro?.
----
    Il displasè me mari lu veve tal cûr, sintint chês comaris che no cjatavin “la glagn al glimuç” , in chel, une mê agne che veve la lenghe sclete, ur dîs:   - Se no ves altri , vait a viodi di dulà che e je partide cheste “purcite”, cussì si metarès il cûr in pas, cence rompius tant il cjâf –
    Rabiosis par no ve risolt il probleme, a cjapin su lis lôr gamelis, lant ognidune a cjase sô.
Mê agne riduçant e jentre dentri cjase a contai a mê mari il fat, che par dì il vêr in chei moments no veve voie di fotis.…

E son ricuarts di: Anute Leonarduzzi di Rosari Santa Fe, Argjentine
…

Il ses dai agnui

2011-03-19T07:51:00.000-07:00

Une des plui deplorevulis mancjancis di informazion, che a àn sufiert i oms e lis feminis in dutis lis epochis, si relazione cul ses dai agnui. Il dât, mai confermât, che i agnui no fasin l’amôr, forsit al significhe che no lu fasin ae stesse maniere dai mortâi.

Une altre version, mai confermade però plui inverosimil, a sugjerive che se ben i agnui no fasin l’amôr cui lôr cuarps (pe semplice reson che no ju àn) lu celebrin in cambiio cun peraulis adeguadis.

---

Cussì, ogni volte che Agnul e Agnule si cjatavin te intersezion di dôs trasparencis, a scomençavin a cjalâsi, sedusintsi e tentantsi mediant il scambi di smicjadis, clarementri angjelichis.

E se Agnul, par vierzi il fûc, al dîs: “semence”, Agnule e stiçave rispuindint: “agâr”. Lui al dîs: “lavine”, je delicadementri e dîs: “precipizi”.

Lis peraulis si incrosin,turbantsi come meteorits o cjarezant come flocs di nêf. Agnul al dîs: “trâf”. Agnule e dîs: “grote”.

---

A svolacin par li un Agnul custodi, misogjin e cidin e un Agnul de muart, vedul e nereôs. Però la copie di amadôrs no si interomp, continuant sivilant sul amôr.

---

Lui al dîs: “risultive”. E je “bacin”.

Lis silabis si imbombin di rosade e par chi e par là, cristai di nêf a circolin tal aiar cu la sô spiete.

Agnul al dîs: “spade”. Agnule sflandorose e rispuint: “feride”. Lui al dîs: “glon” e je: “scjampanade”.

---

E tal precîs istant dal orgasmi ultra teren, i cirs e i cumulonimbi, a fremin sclopant tun sgrisulâ.L'amôr dai agnui al plûf bondant sore il mont.

----

L’origjinâl in spagnûl al è di: Mario Benedetti scritôr, poete e sagjist. Al jere di nazionalitât Uruguayane. La so produzion leterarie e je stade une vore intense.

Jo mi soi dome permetût di tradusilu, o speri di vê fat un bon lavôr.

----

Mistirs di îr

2011-03-04T09:20:00.000-08:00

Se i grancj stiliscj, cence fâ nons a usassin tes lôr sfiladis di alte mode li borsis di scus, un altri discors al sarès sul tignî cont l’ambient……….

Lassant pierdi lis batudis: lis sportis di scus a àn dât lavôr tes vecjis fameis rurâls furlanis e venetis, dal inizi ‘800 fin ai ultins agns ’60; po dopo, la piel e la plastiche lavorade a àn cjapât preminence sul marcjât.

Chestis borsis si jerin fat place te vite cuotidiane de int, des feminis di cjase par lâ a fâ la spese, i contadins par puartâsi il mangjâ tai cjamps e cussì vie…

A jerin timps di miserie, e no si butave vie propri nuie. Tal periodi de racolte de blave, (Setembar e Otubar) si metevin di bande i scus des panolis, sielzint i miôr.

Po dopo si passave a sulfurâju, cheste fase e servive a sblancjâ i scus, a jemplavin une podine cun lôr, a fasevin une buse tal mieç metint un bussulot cun des boris che vignivin spolvaradis cul solfar, a taponavin la podine cun tune cuvierte, tra i doi elements si creave une reazion chimiche, cheste operazion e durave svariadis oris.

Finide la procedure, si veve i scus sblancjâts e umits (issint umits a jerin une vore maleabii) e si scomençave la so lavorazion, che consisteve tal instreçâ un scus cun l’altri in forme elicoidâl, fasint une cuarde resistente (come une tuartie di cjanaipe).

La fase sucessive e jere chê di tramâ la cuarde, che vignive fate rigorosementri a man ator ator di un stamp di len, (a ‘nd jere di variis formis e misuris) che al servive a dai l’aparence ae future borse, une volte che i scus si saressin suiâts.

Di dut chest si po rigjavâ che la nature nus da cetantis risorsis, al stâ in noaltris savêlis doprâ come che fasevin i nestris viei, cence utilizâ tante plastiche che nus puarte a un continui incuinament dal ambient.

---------------------

Un’altre descrizion sui mistîrs di îr, le à scrite Bepi Miconi un amì di Tresesin, che lu ringracii di cheste so colaborazion.
-----

Al cricâ dal...

2011-02-22T09:36:00.000-08:00

“Haiku al è cun semplicitât ce che ai sucêt ae nature e ai umans”

Al cricâ dal dì.

La brise de matine

e sglonfe tendis.

....

Polse e calme...

2011-02-13T05:01:00.000-08:00

Il “Haiku” a ie une des formis di poesie tradizionâl gjaponese: al consist cuasi simpri tun poeme curt di trê viers di 5, 7 e 5 silabis rispetivementri, cence rime, se ben chestis regulis a puedin no sei rispietadis, specialmentri in ocident
Tradizionalmentri il “Haiku” al descrîf i fenomenots naturâi, il cambiio des stagjons o de vite cuotidiane de int. Il sô stîl si caraterize pe sô naturalitât e semplicitât, e al trate di descrivi di maniere curte, une sene, une imagjin.

Polse e calme

te çusse dal pisulâ.

Si slungje la sere.

......

Siet colôrs

2011-02-09T10:47:00.000-08:00

Siet colôrs
Al jere une volte un paîs lontan
dulà che i colôrs si davin la man,
fra ducj il “Ros” il plui piçulut
ai stave daprûf dal “Narançut”
Al rideve fuart il “Zal” brilant,
il "Vert" parmìs aes plantis fevelant.
Alts tal cîl il “Turchin” e il “Blu”
a cjalavin la tiere stant lassù.
Il plui grant e scûr al jere il “Viole”
ma i siet a someavin une robe sole.E cui che ju viodeve tal cîl in larc
al diseve:

“Cjalait…L’arc di San Marc”

--------------------------------------------

L’Origjinâl in Lenghe Taliane al è di: Elio Giacone.

Lu à tradôt al furlan:

Galliano Remo De Agostini.

--------

L’Impuartance dal gjornâl

2011-01-29T06:54:00.000-08:00

Al gjornâl mai lu rimplaçarà Internet.

Us disarai cualchi ûs domestic impuartânt, che nus dan i soi sfueis: Par madressi lis pomis, netâ i veris, involuçâ i ûfs, impacâ la platarie tal stralozâ, cuvierzi i mobii prin di da di blanc, cuvierzi il paviment de gabie dai uciei.

Come ûs educatîf: Petâ tal music dal cjan se al urine dentri cjase, ritaiâ letaris e fotografiis pai compits dai fruts, fâ pipinuts e barcjutis di cjarte, sbregâ il tocut blanc di parsore par notâ numars di telefon.

Come ûs comerciâl: Par slargjâ lis scarpis e jemplâ borsis par che no pierdin la forme, fa pacuts cui clauts te feramente, fâ un cjapiel pal pitôr o muredôr, par voluçâ rosis e dâ lavôr ai gjornaliscj,

Altris ûs: Fâ balutis e tirâlis ai compagns di scuele, cuant che al plûf a mo di ombrene, par no ruvinâ la petenadure, par che il “trist” de pelicule al puedi scuindi la pistole, par platâsi daur di lui cuant che no tu vuelis sei ricognossût…. E tancj altris ûs, che no rivin a imagjinâ

Ah!!!! E par ultin e mancul impuartant!!! “Par savè lis ultimis novitâts.

.....

Lis mudantis

2011-01-20T10:07:00.000-08:00

Al jere Istât. A Gonârs a vevin organizât un pelegrinaç a Madone di Mont, me mari che veve tant ce ringraciâ ae Madonute, e cjape part.

----

Jo o vevi 4 agns, e o soi restade cun agne Catine che par di il vêr no veve tante pazience. La mame e je partide a buinore lassantmi durmî.

----

A lis vot, gnagne Catine e ven a sveâmi, prin di dut lis orazions e po a comence a vistimi: prin la cotule sot, il vistidut e dopo i scarpets, mi lave la muse mi petene, e po jo i ricuardi che no mi veve metût lis mudantis… puarete, je no lis usave. E cussì che a fuarce di vitis mes a metudis.

----

Tor lis nûf di sere me mari e torne a cjase. Gnagne Catine i conte che o soi stade triste dut il dì, che o volevi gjavâmi lis mudantis, insome che le ai fate deventà mate. Rivade la ore di la a durmì me mari mi a disvistude , oh sorprese !!!!!

Gnagne Catine mi veve metût lis dôs gjambutis intune sole gjambe des mudantis, sigûr che o soi stade triste dut il dì, si no podevi nancje cjaminâ !! mi crodêso !! che le ai fate deventâ mate.

----

Cheste simpatiche conte le à scrite la siore Anute Leonarduzzi, che vîf a Rosari di Santa Fe in Argjentine.

....

Purcitâ

2011-01-10T07:57:00.000-08:00

Vuê us propon une conte, le à scrite Bepi Micon un gno amì di Tresesin, lu ringracii di cheste so colaborazion.

---

I timps a passin e lis usancis de int ancje, il ricuart mi puarte a tancj agns fà, cuant che copâ il purcit e jere sagre in famee.

O des primis zornadis fredis di Novembar, cuant che la matine o levi a scuele viodint tai curtîi i cjalderons plens di aghe che bulive, le usavin par spelâ l’animâl, che si lu sintive rugnâ prin che lu copassin.

...

Di ricuarts o ‘nd ai tancj: de fieste di chel dì in famee, dai preparatîfs, il continui lâ e vignî de int, che voleve jentrâ un moment, tun contest familiâr tipic furlan, al butilion dal vin e alc altri, aes fetinis di cjar cuetis su la lastre, odorâ lis fragrancis des droghis, cuant che noaltris fruts o messedavin la cjar masanade.

...

La zornade e scomence unevore adore, aes 5 di matine o impii il fûc par fâ boli l’aghe, aes 7, il purcit si cjate bielzà in posizion orizontâl pront par jessi spelât, di consecuence si nete lis vissaris, la fase sucessive si lu dismembre par fâ la sielte des cjars, une volte dividudis si lis masane, chê dal salam, dal muset e de luianie ecc, vignint tratadis cu lis droghis, sal, pevar cuntun infûs di vin e ai.

La fase finâl de insacade e de leadure, che cun la stagjonadure e darà un prodot omogjeni, fin ae preparazion de panzete, che e à il stes rituâl de cueste.

...
La zornade si conclût cuntune cene, pensânt ae prossime anade, lassant daur un altri an, che, al restarà tai miei ricuarts e di ducj i presints.

...

Dut chest si manten in me, tal continuâ cun cheste tradizion, che si ripet une volte a d’an, da tancj agns.

Ocasions che no si riproponin plui tes fameis. Moments di tradizion e convivi che si stan pierdint, sostituîts dai timps de modernitât.

---

BON PRINCIPI...

2011-01-01T05:35:00.000-08:00

------

Bon principi da l'an, mi daiso la buine man?

---------

Vacancis...

2010-11-19T08:42:00.000-08:00

     L’Istât al sta rivânt tal emisferi sud e cun lui, il bon timp, il cjalt e il soreli. Partant al rivâ il moment necessari par polsâ e des vacancis.

     “Storiis” si cjaparà la part che ai corispuint, lu cjatarês in cualchi isule dal Atlantic. Par no pierdi contat cui soi letôrs, us sugjerìs di fracà culi:

     www.leturis.blogspot.com

o seguirès informâts.
...

Tornât a migrâ tal so paîs, ultin cjapitul

2010-10-24T15:51:00.000-07:00

...

Dut chest moviment lu consolave, lu faseve sta miôr, ad ogni mût si jere za prometût a se stes che nol varès passat un’altri Invier li.

...

E cussì a je stade, ma no par decision proprie ma dai parons che deciderin di vendi dute chê proprietât ad altris, ad un “pool”, che al veve une cjadene di albiercs in zone.
...
E ven fate une selezion dal personâl di dute la cjadene, chel che al jere ca, lu mandin là e vicevierse, a vegnin separadis lis clapis che al jere tancj agns che lavoravin insiemi.
...
Chei in etât di pension ju àn mandâts a cjase, lui al jere tra chescj ultins, mi par che no jai displasût par nuie, e rivave la tant desiderade libertât.
...
Al è tornât a cjase sô, cjapânt su cualchi ativitât lavorative e ancje di svagament, di distrazion, in pocs mes al jere tornât a brancâ di gnûf lis redinis de so vite.
...
Cjalant indaûr o soi sigûr che al fasarès di gnuf ce che al veve fat, e je stade une esperience di vite, diferente dal solit dran dran, di sigur, cui soi lâts positîfs e di chei altris.
...
Ca e finis la storie di un emigrânt, che al è tornât a emigrâ te sô Patrie di origjin.
Speri tant che ûs vedi intratignûts.

…

la imagjine e je cjolte sul web

...

Tornât a migrâ tal so paîs 11º cjapitul

2010-10-15T18:32:00.000-07:00

Tal cenon dal ultin dal an, al faseve frêt, la temperadure e jere che al varès podût neveâ in cualsisei moment. Lis puartadis un grum, prins, seconts, lis verduris, i dolçs, trê cjaliçs in taule pes bibitis, pal vin, pe aghe e pal spumant.
---
E ce che al conte cumò al somee preparât da un senograf, lûs eletrichis impiadis and’ere pocjis, si invezit tantis cjandelis, la sale a veve tantis puartis barcons cun tendinis a soflet che lis vevin tiradis su, a si viodeve dut il lât. Tor miezegnot i camarîrs a scomençavin a servî il spumant e al scomençâ ancje a neveâ, no podevi crodi che la nature i stes dant un paliatîf ae sô solitudin, di fat al jere come viodi une biele cartuline, dome che cheste e jere reâl, lu a gjavât par un larc moment de monotonie de fieste che za e jere impussibil di sopuartâ.
---
Al pareve che l’Invier nol finive plui, si sintive cjapât dentri i limits di un teritori gjeografic, a someave une gabie di aur, il lât devant l’albierc, sierât dentri di un cercli di montagnis, in fonts maestose si alçave la Grigna, d’Invier i soi pics a erin ducj blancs.
Pecjât che nol jere nassût di chês bandis li, al varès vût chel tant di pas interiôr, par podê gjoldi dute che bielece naturâl, ma come che a disin, “li che si nâs ogni jerbe e pas”, il fat al è che si jere imponût une mete, che al faseve fadie a puartâle a bon fin.
---
Di gnûf al è rivât il mes di Març, e come ogni an un trop di int cun peçots, scovis e ce che al covente par mondâ, netâ, smondeâ i cinc plans, picjant chês tindinonis che a levin dal tet fintremai partiere.
---
Il zardinîr impegnât a rimovi, savoltâ la tiere dai strops, par plantâ rosis di stagjon.

Nol veve mai viodût in vite sô tantis azaleis di ducj i colôrs, insome rimitint in sest par podè vierzi al public te setemane di Pasche.

---
La imagjine e je cjolte sul web

Tornât a migrâ tal so paîs 10 cjapitul

2010-10-08T12:15:00.000-07:00

Si meteve a sunâ une armoniche che al veve , il rivoc dai suns te stanzie vueide al jere dut un spandisi, un sparniçâsi, lis melodiis a jemplavin i salons cence mobii, cence tendinis, metìnsi pes fressuris des puartis.
---

D’un trat dut al cjapave vite, si impiavin i lusôr, i clients a balavin, i camarîrs ai ordins dal "maitre" a levin di ca par là cjapant e puartant lis ordenazions a lis taulis, i siôrs ai disevin robis tes orelis aes sioris, che molavin grandis ridadis, movint la vintuline come ativitât di stimul cun dai riflès gnervôs.

---

Il gran valç al ricêf batimans a dute butade, ve ca, che tachin “Violino Tzigano”, un doi un, un doi un, i precis pas dai balarins che sghirlavin a la “Valentino”. Il cavalîr fasint il pas plui lunc de gjambe e la dame pognìnti il cjâf si lassave lâ bandonantsi, si fidave dal so cortesan, e jere in buinis mans…
---
Fin tant che il sunadôr i deve al fol dut ben, ma finide la sunade al tornave a cjapâ cussience de situación. I parons ai vevin prometût che varessin puartat dongje un altri cjan, ma cul timp a la capît che nol jentrave tai lôr interès.
---
Intant a jerin rivâts a lis fiestis. I parons ai vevin dit che i varassin paiat lôr il gustâ di Nadâl e il cenon di sant Silviestri tun ristorant de zone, cussì nol si sarès sintût tant sôl: dantjur graciis dal amabil pinsîr tai soi rivuarts, i fasè i auguris di formalitât.
Tai doi events lu àn sentât tune taulute metude in font al salon, preparade cundut par une persone sole, i son coladis lis gjambis, al pensave che lu varessin sentât cun altris. Si viodeve un centenâr di personis, i grups a jerin di cuatri in su, ducj a fevelavin, a ridevin, a cisicavin.
---
No la podût tasê a se stes fasìnsi une riflession sul “sintisi sôl”. Nol bastave contornâsi di cent personis par sintisi in compagnie, anzit a marcave di plui la diference.

---

Tornât a migrâ tal so paîs, 9º cjapitul

2010-10-02T03:43:00.000-07:00

No pues fâ di mancul di contâus un fatarel. Une sere che al jere in dispense dant fûr il bevi ai camarîrs, al rivâ il “maitre” disinti:
– Tu che tu fevelis spagnûl, ce vuelial dì “agua de grifo”-,

- orpo parcè i domandi, - -un trop di spagnûi le domande par bevi -

i spieghe che “grifo” al vûl di rubinet, - ah o capis no vuelin spindi, ur puartarai aghe di fontane, alore -.
---
Cussì je rivade la gnove stagjon puartant turiscj a trops, nol veve mai sintudis fevelâ tantis lenghis dutis insiemi, good days, bon jour, guter tag, buenos dias.
---
Cumò al veve capît parcè che no an podût finî la famose tor di Babilonie, e jere tante la confusion idiomatiche che no rivarin a cumbinâ nuie di sest.
Par fortune che nol veve contât diret cui forestîrs, al rispuindeve dome a es domandis dai Talians e Spagnûi, lenghis che lis saveve, a dutis chês altri lenghis ur diseve: “Please go to the counter”, che al vûl dì alc come “par plasè domandaitji tal ricevidôr”, cheste frase je veve insegnade il "barman", chel si, che lis saveve fevelâ dutis, cun cuarante agns di mistîr preparant aperitîfs in locâi impuartants.
---
Fin che durave la stagjon, al sopuartave la lontanance dal paîs, de cjase, de int.

Il continui moviment tal albierc a jere cence padin. A polsavin juste chel tant par tornà a scomençâ. Al veve libâr une dì par setemane (il plui trancuîl), le passave durmint la gran part, simpri al jere in debit cul polsâ, bisugnave recuperâ. e cussì zornade daur zornade si rivave in font a Otubar.
---

Un’altri Invier a lis puartis, e di gnûf la prospetive dai cuatri mes di bessôl, e chest an nancje un cjan par dongje. Savêso ce che al faseve?: la domenie matine al leve a cjapâ messe grande te glesie dal paîs, sal veve fortune che chê dì al cjantave il côr, miôr, e ancje al butave ju cuatri peraulis cu la int che al veve fat cognossince. Finide la funzion al tornave te sô residence, dulà che lu riceveve un cidinôr di fa pôre.

---

Tornât a migrâ tal so paîs 8º cjapitul

2010-09-25T05:02:00.000-07:00

E par sierâ cun Camilo, nus contave che dopo la sô muart, i cuatri mês d’Invier no jerin i stes di cuant che jere vive la bestie. Dutis chês oris passadis bessôl tal chel grant stabil di cinc plans, zornadatis cun ploiis, cun bârs di fumate, cun cualchi neveade, cun improvisis e fuartis svintadis, che fasevin sbalotâ lis antis dai barcons, scugnint la a fa une ricognizion, plan par plan, cjamare par cjamare, par cjatâ il sdrondenament
---
Cuant che al viveve il cjan lu compagnave in chestis incursions, metint il nasic dapardut, fasint vignî fûr de cove un gjat o une surîs. Des voltis a cjolevin ancje la lus. In veretât nus diseve, che a la sintude la mancjance, lui che nol veve mai vût pes mans un animâl, al è rivât a capì l’impuartance dal rapuart, la fedeltât, il rispiet e la compagnie che dan, volinle mutuâl e vicendevul.
---
Ogni une des lenghis dai turiscjs, e trasmeteve un mût di sei de persone, si lu capive viodenlu tal compuartament, metin il todesc, di gulizion al voleve cudumars sot asêt, "leberwurst", salam ongjarês e pan integrâl, a la sere cuant che al tornave de gjite, al beveve soredut vin e bire, insome al jere bevaçon.
---
I americans dal nord invecji a volevin ûs strapaçâts cu la panzete fumade, ûfs a la “coque” ti disevin ancje trops minuts che al veve di cueisi, tal mandavin indaûr se nol jere di lôr agrât, e tant, ma tant cafè.
---
Il talian al jere il plui “light”, lizêr. Come ducj chei altris al profitave de tradizionâl “gulizion Continentâl”, formadis, grassine di robe purcine e marmeladis, e che no i fos mancjade la brioche cul cafè lat. A la sere in te cene, (ancje i spagnûi) a jerin in pocs che ordenavin une butilie di vin (le paiavin a part), a protestavin che l’aghe minerâl e jere masse cjare, che in buteghe e costave trê voltis di mancul.

E cussì si leve indenamt cu la stagjon.

---

La imagjine e je cjolte sul web

...

Tornât a migrâ tal so paîs 7 cjapitul

2010-09-17T13:05:00.000-07:00

Ultimementri no lu viodevin dal dut ben, nee cun tante voie di cjaminâ, distirât tra i cjadreons des salis, al pareve che al podarès rivâ a da fastidi ai ospits covaçâts tai sofâs e poltronis.
----

La vecjaie tun animâl e somee tant a chê dal uman, ducj i doi a àn bisugne di atenzions , in cierts câs a puedin ancje rivâ a da fastidi, une dì a àn savût che il paron lu veve cjariât in machine, puartantilu tun canile alc lontanut, ur disevin che al veve un bon tratament.

Al pôc timp a àn savût che cuntune punture al veve finît di sofrì.
----

A lis personis i disin: tu viodarâs ce ben che tu vâs a sta, tu puedis fâti amîs, zuià di cjartis cui to coetaniis, tu as un miedi ducj i dîs, cjapâ soreli ecc ecc.
La “siura”, cualchi an prin di murì e cuant che fevelave cun cualchidun di cualchidun e diseve:
– Il mio Camilo al è plui inteligjent di tantis personis che jo no acuardi su ce che disin -
Opinions a son opinions.
----

Durant la zornade, la persone incaricade, lu menave a spas, a fasevin dai grancj zîrs, si po di che insiemi a Camilo a la vût mût di cognossi i dintors, piçulis borgadis pierdudis tra une vâl e un mont, tra une stradele di claps e un troi di campagne.
----

A cjaminavin ancje variis oris. Ogni tant cjalant in bas dal puest che si cjatavin, a viodevin simpri il lât, cu la sô aghe di un colôr a mieze strade tra il blu e il celest. A chest pont si sentavin, lui suntune piere e Camilo si distirave dongje, no sai se vevin la stesse vision di ce che viodevin.
Tal lât al jere simpri un va e ven des ondis, prodot dal la e vignì di piçulis e medianis imbarcazions di pescje o dipuart.

----

Te prime volte al veve vût la sensazion che si jerin pierdûts tai jenfris di une bosc, lu veve fevelât, a i àn dit che al les simpri viers il bas, tignînt il lat come reference no podevin pierdisi, une volte rivàs sul stradon al jere di la o a diestre o a çampe, dipendint di dulà che jerin saltâts fûr.

----
La imagjine e je cjolte sul web

Tornât a migrâ tal so paîs 6º cjapitul

2010-09-10T11:40:00.000-07:00

A lis siet di buinore, Camilo, cu la çate diestre al sgrifignave su la puarte de cjamare, al fermave cuant che al sintive une vôs che i diseve :
- Camilo lassimi durmì-, fermant par cualchi istant, subit al tacave di gnûf. A chest pont bisugnave rindisi ai soi ordins, vierzìnti la puarte, il cjan sossolât al menave la code, saltantti intor, al voleve disi che i vierzês la puarte dal zardin, i dibisugns lu pressavin urgjentmentri. Par chel cont al jere stât educât ben, al saveve cemût domandâ.
---

Par durmì al veve une cuvierte dongje la puarte di veri, che dave su la scjalinade de jentrade. Un avampost assegnât a un soldât in postazion, che al frontave l’atac dal nemì. Difat cualsisei che al fos presentât devant de puarte vie pe gnot, al scomençave a vuaca, molamt cuant che la o lis personis a jerin fûr dal so cjamp visîf.
---
Durant il dì al jere diferent, se al ricognosseve la persone, al menave la code, se no ai faseve cuintri.
Ca, o ai capît la inteligjence di ciertis bestiis. Il compuartament di Camilo viers lis personis, al jere diferent te stagjon de vierte, cui clients dal albierc che levin e vignivin, inveci durant l’Invier si mostrave come un vêr vuardian, i mancjave dome la sclope….
---

Cussì a passavin i agns a ducj i doi, par Camilo al jere rivât il moment che nol podeve plui vivi tal albierc. A jerin za passats cuindis agns che la “Siura” lu veve “adotât” di piçul. Al jere abituât a torzeonâ tai salons e salots, a pognisi, distirâsi tai tapets e a ricevi i compliments dai ospits.
---
Ai colave il pêl, a moments al brancolave tant che un cjochele, lis gjambis a scomençavin a clopai, al è stat testemoni dai intrigôs ultins agns di vite de sô parone. Sal vês podût fevelâ, Camilo an varès ditis di cuetis e di crudis e ancjemò in variis lenghis, soredut in Comasc, in Talian, e vie vie.

….

Tornât a migrâ tal sô paîs, 5º cjapitul

2010-09-03T12:16:00.000-07:00

In vite di cheste siore, che a so timp e jere impleade tal albierc, e veve sposât il paron restât vedul, issint muarte la femine di part. A sô volte e jere restade vedue dal paron, no veve fiis, nee famee proprie, lui in cambiio al veve nevôts fiis di fradis.
La siore no leve dacuardi cun cheste parintât, che mai ai vevin dimostrât simpatie , ur veve fate la crôs, paiantju cu la stesse monede.
---

A mancjance di afiets umans, il cjan al veve ducj i privilegjiius pussibii e inimagjinabii. Al veve la cjamarute cun tant di materassut e linzûi, che comunicave cu la stanzie de siore. Lu menave ator in machine, e a chel che lu puartave a spas, i deve un biliet di bancje. Il veterinari i veve racomandât di fâlu cjaminâ, di fai fa esercizis, al veve i soi agns e al coreve il riscjio che ai clopassin lis gjambis posteriôrs.

La persone de cuâl us conti la storie, no je rivade a cognossi la “Siura Ana”, issint muarte pocs mês prin che lu cjolessin a vore. Ce che nus à contât, jal vevin contât a lui, al diseve che la siore e jere pardabon particolâr, ancje un pôc strambe, soredut tai ultins timps.
Tal so apartament privât dal prin plan, e veve fat meti une puarte blindade, cun des sieraduris sofisticadis. Met che vie pe gnot i fos vignût un malstâ, massime se improvîs e curt, tal doman , e varessin dovût clamâ i pompîrs.

---
Ce che je restât a lui oltri il dovè di vuardeâ un stabil di cinc plans, plen di coridôrs, scjalis, cantinis, cjamaris, cjamarutis, sofitis, solârs e cuant altri.

---

Al veve a caric, come che fos une persone di famee, nuie di mancul che Camilo. Une responsabilitât mai vude ,che di vuardeâ un animâl. Si jerin fats amîs, ai lave simpri daûr. Buinore e sere i dave un scudielot di mangjative , tun lamp lu finive, podopo lu cjalave cun voi di bo, al veve simpri fan.

---

Tornât a migrâ tal so paîs 4º cjapitul

2010-08-27T12:57:00.000-07:00

I restave pûr simpri la cjase in chê altre part dal mont. Ancjemò nol jere il moment di pensâ a je, vent devant di se une mission di puartâ a tiermin.
--
“Diu al cjape pal cuel, ma nol scjafoie”, e diseve une vecjute che le saveve lungje. Di fat come che us disevi, lu an impleât tun albierc di categorie, come sorestant dal setôr gastronomic, un lavôr pignûl di memorie, no bisugnave falâ, fasinti in mût che il davuelziment diari al fos fluit, za che il zîr di turisim al jere impuartânt.
--
I prins doi agns al à fat dome la stagjon, il lûc al vierzeve tor Pasche, sierant a finâi di Otubar, al veve cuatri mês libars , nol jere di disperâsi, la leç sui stagjonai e jere fate in mût che tu cjapavis mieç stipendi tai mês di puce fadie.
--
Tal tierç an che al jere li, i proponin di fermâsi ancje tai mes di Invier. In cierte maniere bessôl, orpo, a la vût un bot al cûr, no stait a domandai il parcè, ur dîs che al pensarà, ancje se al saveve che al varès dit di si, simpri lu stes in circostancis simil, si sarès sintût mal tal di di “no”, ancje se a partì dal “si”, i coventave cualchi dì, orientâ tal spazi la gnove situazion. --
Dut chel che al veve predisponût prin dal si, al jere in timp di verp passat. Fatis lis vacancis prin che sierassin, al torne par fasi caric. I prin dîs dut ben , al veve la compagnie dì operaris e impleâts aministratîfs fin a lis cinc di sere, che fasevin dai lavôrs conservatîfs e aministratîfs de aziende.
--
Dopo al restave sôl cu la presince di un cjan pastôr todesc. No stait a ridi, al veve un non di persone, la vecje parone i veve metût non Camilo.

La imagjine e je stade cjolte sul web.

Tornât a migrâ tal so paîs 3º cjapitul

2010-08-20T23:54:00.000-07:00

Al jere un bidon no masse grant, i vevin tacât un mani che partint a fîl di sot dal bussulot al rivave fintremai ae altece de persone, metude une cuarde, ancje chê e partive de bande contrarie rivânt fin parsore dal mani, ben tensionate, ogni tant i passavin dal gras, che cuant che si secjave e pareve une cuarde di liron.
--

A sunavin par chi e par la, in piçulis sagris di borcs, in riunions, in convivis e rinfrescs, metint dongje il biel e il bon. Une sere di sabide, al faseve cjalt, a son stâts invidats de Pro Loco dal paîs a sunâ tune piçule frazion clamade Feletan.
--

A varessin sunât tune SAGRE!. Un biel pas indevant. E vevin un piçul senari, de bande daûr si viodeve un ort. La plaçute no plui grande di un façolet e leve in rive su, là sù e jere la scjalinade che puartave ae piçule glesie dedicade secui indaûr a…San Leonart, vuê e je consacrade ae Nativitât.
--

Lis cubies che balavin a parevin sospindudis tal aiar, e devin ve fat une fadie par mantignì l’ecuilibri e no fa un tombul.
I barachins gastronomics e mostravin i lôr aspiets regjonâi, polente rustide, salam tal asêt, fertaie cu la cevole, formadis, vin di cjase. E an finît la sierade cjantant ducj insiemi, si tignivin un cun l’altri par no rodolâ ju pe plaçute.
--
E come dutis lis robis che somein stabilis, no risultin tant, in cualsisei moment a scomencin a fâ aghe di cualchi bande, cussì le stât. Lis causis, simpri lis stessis, tal osservâ une situazion tal so personâl o ancje te sô globalitât, un’altre volte al à dovût emigrâ, une emigrazion interne, cjatânt lavôr tun puest maraveôs su la rive di un lât lombart.
--
Di gnûf dovè lassâ l’acuistat, lavôr, amîs, distrazions, in sintesi, il paîs, mai nol finive di fa valisiis, cuant saressie rivade la ore di fermâsi fis, permanent, stabil tun puest?.

La foto me a zentilmentri mandade l'ami Claudio Codut

Tornât a migrâ tal so paîs, 2º cjapitul

2010-08-13T06:22:00.000-07:00

Une visite al Cjiscjel santuari. Dentri des vecjis parêts a curmei e funzione une cjase di esercizis spirituâi.
--

La place che al veve zuiât di piçul, in chei timps i pareve che fos une plaçone, il centri dal’univiers, vuê bisugne cirìnle te memorie cuasi “inventâle”. Tra la lobiute des corieris, il puest des machinis, vâs cun plantis formânt un sierai, par che passi la int. La crosere tal mieç, cul sô via vai di machinis, che graciis ai semafars no sucedin disgraciis, baste rispietâ colôrs e personis.
--

Ta chei timps a no'nd’erin semafars, cualchi machine circolânt pal stradon, tantis bicicletis, cjars lant e vignint des voris dai cjamps. La place e jere dute lôr (dai fruts), soredut tai dopomisdì fin ore di cene, a zuiavin cun balutis di veri, tune ocasion si jere jempladis lis sachetis rompiint butiliutis di gasose daur de cjase dal santul, no jai mai dit nuie.
--

E zuiavin ancje cun des piçulis slevarîs di piere, devant de feramente di Toni che za no je plui, si, la scjalinade, che vevin di la su e ju saltant simpri cul stes pît, al pierdeve chel che al poiave l’altri pît par tiere, robis di no crodi.
Dut chel trop di mularie, si po dì che jerin ducj imparintâts tra ducj a jemplavin il curtîl.
--
Planc a planc si jere lant metìnsi tal tiessût des robis che ai plasevin fa. Une di chestis, cjantâ in côr, tal paîs a jerin doi grups, decidût cuâl, no la vût problemis di amission, anzit le stât ben acet, scomençât a cjantâ subit. Al jere impuartânt che al cjatàs ce fa, par no sintisi splantât dal dut.
--

Subit si jere fat amîs, cjale il câs a jerin ancje sunadôrs come lui, la casualitât de vite e à volût cussì, e tal timp a àn formât un tercet, armoniche, ghitare e liron, par di il vêr al jere un bas dal dut unevore origjinâl.

Tornât a migrâ tal so paîs 1º Cjapitul

2010-08-06T13:26:00.000-07:00

Finide la soste invernâl, (ca o sin tal emisferi sud)

e torne a voaltris "Storiis di une volte".

Come simpri mi auguri che us plasi.

...........

...

Al po capitâ a ducj che, tal arc di une vite, rifâ la stesse strade fate timp indaûr. Un dietrofront, un sledrosâ, un tornâ al pont di partide, il motîf, il stes de prime volte, cirî gnovis oportunitâts, par rafinâ la cualitât de vite.
...

Cheste e je la storie di un emigrant, che cul lâdal timp al è tornât ae tiere di origjin. Agnorums vivint tun paîs che i paris a vevin sielt. Il ripetisi dai events si dan di cheste maniere, la che tu stavis ben îr, doman no tant, i tocje ae persone decidi se alternâ o mancul.
...
Cjapâ une decision definitive, se dipent di variis personis e po rivâ a sei grivie, se je personâl, baste fa il biliet di lade e la valis come cuant che tu ses rivât. Impuartant il jutori di cualchi don in Patrie che al po fâti il troi plui facil. In timps passâts bastave fasi il biliet dal vapôr, une volte rivât a destin tu varessis cjatât lavôr.
...
Tal câs che o conti e je lade di manuscrit, rivât vuê, tal doman za al jere sot paron. Cuant che al à cjapât la prime cuindisine i pareve di tocjà il cîl cu lis mans, al jere tant timp che nol sucedeve, par un grum di agns si jere simpri avalût bessôl.
...
La situazion e scomençave sot un bon profîl. Dai timp al timp, dut si sarès sistemât. Lis robis a varessin cjapade la plee juste, al veve caratar par rangjâ lis ideis daûr des circostancis. Al jere rivât fin li cuntune finalitât, le varès puartade a bon fin.
...
Man man le tornât a riscuvierzi chel che al veve lassât tant timp fa. La ancone dal angul de stradele che puarte tal borc disore. Une visite ai vecjos de famee tal cimitieri, a jerin parfin lis fotografiis dai soi paris, rivant a viodilis cjalant pal ristiel de fererade. Doi vâs di rosis frescjis, e parsore de jentrade , la scrite: ”Dona eis Domine”. I soi gjenitôrs a jerin sepulîts lâju, ta chê part di mont, che jerin lats a vivi.
...

La imagjine e je cjolte sul web.

...

Storiis...e...Storiutis, ultin cjapitul

2010-07-17T06:48:00.000-07:00

Nus mancjave ancjemò un bon trat di strade par rivâ a cjase, e ancje par cjapâ chel piçul trenut di dôs carocis, vin pensât di fai fa un zîr pe citât, sin montâs su tun biroç a cjavai, o jerin tes primis oris di un dopomisdì, cuntun soreli di primevere, che al scomençave a scjalduçâ, al tirave un aiarin clip che al rivave des montagnis vicinis, il trafic cu la solite congjestion ta chê part di citât, si jere calmât te polse dal gustâ.

....

Me mari , vistude di scûr e cuntun façolet neri tal cjâf, sentade tal mieç di nô doi che o jerin vonde taronts, e someave une frute, li mi soi dât cont come che jerin passâts i agns, dome la cjaladure e jere chê di simpri, si jere fermade tal timp, jai butade une voglade che mi soi sintût frut, come cuant che o levin a marcjât te place dal paîs.
....
Il trenut saldo al sivilave cuant che al passave tal jenfri di chês piçulis e bassis cjasutis, che di bassis che jerin a someavin scjatulis, e vignivin clamadis “ranchos”, ven a stai baracopoli, a jerin dai cuartîrs, si, di int di lavôr ma cence une ocupazion fisse, par chest motîf, puare economichementri, tes perifariis di dutis lis grandis citâts a sin cjate, di chescj aglomerâts.
....
La mame e cjalave saldo fûr de barconete dal tren, no si dave pâs di dì :

– Cjale chi !! Cjale la !!
Fintremai che mi cjalâ in muse, e mi dîs:

– Pieri, Pieri, o soi tant contente, i lavôrs a son ducj di finì ancjemò ca vie, viôt ce tant cefâ che tu varâs!!
Le ai cjalade, o volevi abraçâle e cence disi nuie jai pensât , “biade femine”.

....

Storiis...e...Storiutis 14

2010-07-10T07:08:00.000-07:00

Finalmentri nus rive la notizie che la mame e sarès rivade ai prins di Otubar, viazant in aeri, cuntune femenute dal paîs, che vignive di chestis bandis a viodi la sô famee, mancul mâl o ai pensât, si judaran a vicende.
....
Cu la femine o vin organizât di la a ricevile tal aeropuart de Citât Capitâl, cjapânt un piçul aeri a pocje distance di cjase, tornant de stesse forme.
....

Rivade la zornade, Marie e jo, o jerin te sale di aspiet dal grant aeropuart, un vie vai di no crodi, si sintive fevelâ in dutis lis lenghis, tra poc a varessin sintude un’altre, il “Furlan”.

I nestris voi no si movevin de puarte corint, ogni femenute che vignive fûr, e someave la mame, le varessio cognossude dopo tancj agns?
....

Ta chei minuts mi son passàs vincj agns pal cjâf, ricuardantmi tantis robis, dai nonos, di mio pari, de cjase, e di tantis altris, in chel o sint une vôs come in chel sium te nâf,

- Pieri, Pieri -, e jere la mame, che, lassant colâ un fagot e ven curint viers di me, ce dius, us lassarai che o imagjinedis chescj moments tant particolârs, jo no ai peraulis par descrivi tante emozion di ambo lis parts.
....
Cun Marie si je cjatade subit ben, ancje pal fat che la femine e fevelave furlan, mi a fat plasè viodilis che si tratavin come mari e fie.

Cjatantsi te Citât Capitâl, la mame e je stade dacuardi di la a saludâ al copari Meni, ancje jo za che al jere timp che no si viodevin, al veve lassât di lavorâ, al tignive cont l’ort e i nevôts, ae mame je vignût ben, che oltri a fevelâ di mio pari, e à podût polsâ dopo tantis oris di aeri, tal doman cul avion plui piçul, sin rivâts te citât de nestre zone.

....

La mame no finive plui di maraveâsi des distancis, di dute che tiere che si viodeve dapardut, e fevelant par se a diseve:
- Sal fos vîf to pari, a viodi dute cheste tiere pustote al deventarès mat, che nissun le lavore -.

..............................

Storiis...e...Storiutis 13

2010-07-02T13:49:00.000-07:00

...

Lis mês sûrs Gjise e Tine, a vevin vût un frutin , la “Francese” ducj i agns, par Madone d’Avost e vignive a cjatâju, simpri cul so piçul e cuntun fi dal so om.
Gjise che viveve tai cjasâi disore, ancje je ta che epoche e jere saldo in cjase, ûs vevi contât che lis dôs sûrs a jerin unevore amijes, simpri stadis.
...

Mio fradi, al veve bielzà fat il militâr, tornât a cjase a la podût dai une man a nestri pari, che tai ultins timps no si lu viodeve tant ben di salût, poc timp dopo e an scugnût ricoverâlu, ma di cheste no si e salvât purtrop.
...
Me mari puarine, che pareve la plui debil, a sopuartâ dutis chestis contrarietâts di vite,

cjatânt simpri la fuarce di reagjì.
...

Une biele, Beppi (mio fradi) in cuatri e cuatri vôt, si e sposât cuntune dal borc disot, secont cualchi peçotone e petegule dal paîs, che mai a mancjin, al pararès che an scugnût maridâsi di “corse”, a son deventâts paris dopo cuasit siet mês, normâl, no!! Il frut al pesave plui di cuatri chilos!!
...
La composizion de famee e veve sufiert dai cambiis, i vecjos a son muarts, trê sûrs sposadis e ladis vie di cjase, jo jai formât une gnove cjasade in Americhe
...
Te cjase tal paîs e restave, mê mari, mio fradi sposât e za cun tun frut, e une sûr ancjemò di maridâ, che al pareve no veti nissune premure di fâlu.
...
Al jere rivât il moment (simpri rimandât) che la mame si decidês a traviersà la grande poce, come che si jerin prometûts, e che vignis a cjatânus, e sal jere so plasè forsit a fermâsi, jai mandât il biliet, lassantti la date libare, cussì e podeve decidi cuant fa il viaç, le vevi conseade di partì tal autun furlan, cussì a varès cjatade la primevere ca ju di nô.

...

Jai scrit insiemi cu la me femine, i fruts ancje i an volût meti dôs peraulis, te lôr lenghe si capis,

o soi sigûr che il cûr di none lis a capidis.

...

Storiis...e...Storiutis 12

2010-06-25T18:31:00.000-07:00

Il machinist al tocjave saldo il sivilot, forsit par spaventâ cualchi gjaline che passonave di chês bandis.
....
Cuasi trê oris daspò de partence, si sta rivânt ,bielzà si viodevin bielis cjasis, ancje di lusso, la stazion e à l’aspiet di impuartance, dapardut une vegjetazion mediteranie, mi à plasût subit, mi faseve ricuardâ il mio paîs d’Istât cun dut chel vert.
....
I smonti dal tren cjalantmi atôr, fin che o viôt vicinâsi un om, al veve su par ju l’etât di mio pari – Pieri - o sint, si, - Lui al è -, une strete ben fuarte di mans, scuadrantmi dret tai voi, mi dîs – Benvignût, e no sta dami dal Lui, clamimi Toni, mi soi sintût subit comut, pe sô maniere francje e drete di dì lis robis.
....
E al è propit cussì che stan e che son ladis lis robis, e son stâts agns di lavôr, cun mio missêr Toni, che mi a simpri tignût cont come un dêt madûr, come che o fos stât un fi, al à vût cuatri frutis cirint il mascjo.
....
No ûs vevi dit ? mi soi sposât cun so fie Marie, di cualchi an plui zovine di me,
o vin bielzà doi fîs, Carlin e Rosine.
....
Lavôr no nus je mai mancjât, ancje pal fat che issint une zone di grant turisim, la costruzion je lade simpri indevant ben, o vin ancje scugnût cirì dai manoâi, comprât ancje des machinis, di traspuart e di lavôr, insome o vevin chei argagns par podê cjapâ su dai lavôrs di cierte impuartance.
....
In ducj chescj ultins agns, o ai forsit trascurât la mê famee furlane, a jerin plui lis letaris che o ricevevi des mês sûrs, di chês che o rispuindevi, lis novitâts a son stadis di bielis e di brutis, une sûr si je sposade cuntun dal paîs, vicin cjase, cussì che va saldo a viodi la mame, i nonos bielzà vielis, a distance di pôc timp un da l’altri a son passâts a miôr vite.
....
Mio pari dopo de mê partence (mi disevin) si jere sierât in se stes, un dolôr suturni lu mantignive dut il timp avilît, al jere jentrât tune situazion,
di chês che al è dificil saltâ fûr.
....

Storiis...e...Storiutis 11

2010-06-12T09:58:00.000-07:00

- O ai un amì furlan tal interni dal paîs, il puest al è unevore biel, anzit ti disarai che al somee tant al nestri Friûl.

A la montagnis, flums, ti plasarà o soi sigûr, cheste persone e lavore par so cont, e a la bisugne di cualchidun come te, parcè no vâstu fin la, fevele cun lui, o soi sigûr che tu cumbinarâs alc di sest, prove , tu sas che cjase me e je simpri vierte par te -.

Ma la dit dut di un flât (e di un flât a la parât ju une taçute) salacor par no pierdi il fîl dal discors, a chest pont mi soi rindût cont, che o dovevi cjapâ in man la responsabilitât de rispueste, che varès puartât po dopo autonomie ae mê vite.

Meni mi a compagnât te stazion grande dai trens, un viaç lunc che a la durât dute la gnot e part de matine, ma li no finive la corse, dovint la tu’altre stazion plui piçule, o vevi imparât vonde ben a fevelâ la lenghe locâl, podint davuelzimi cun trancuilitât tai umbriçons des grandis citâts.

Mi vevin visât che il convoi al veve dome dôs carocis, e i binaris plui strets dal solit, come che o vevi un par di oris di spiete, intratant che o spietavi il trenut o soi lât a fa cuatri pas dulintor la stazion.

la sô marcje di bol. Il panorame unevore diferent di dulà che al viveve Meni, ancje cheste e jere une grande citât, ma alc di diviers, e veve soredut cjasis e glesiis di stîl Coloniâl, i tresinte agns di colonizazion Spagnole e veve lassât

Cjalânt oltri si viodeve dute une curnîs di montagnis, sierantti dentri la citât, che si cjatave a sei tune buse, la tradote mi varès puartât adalt, dulà che il clime al jere plui sec e l’aiar plui fin.

Cjapât il tren, in pocs minûts al scomence a rimpinâsi lizêr, tu ti davis cont ca si leve in rive su, i panoramis a si cambiavin in continuitât, mo un splaç, mo une val lungje e strete, podopo une galarie, tu saltavis fûr tune piçule stazionute, cun cuatri cjasis atôr, poc dopo la ferade e passave tal mieç dun trop di piçulis cjasutis, a si lis viodeve di ca e di la, come fasint un coridôr,
si viodevin ancje dai orts coltivâts.
----------

Storiis...e...Storiutis 10

2010-06-04T18:45:00.000-07:00

Di fat tal’doman a buinore o smontavi cu la mê valisute, cuntune man denant e chê altre daûr come che si dîs, o stavi poiant i pîs in tiere Americane.

Mi soi sintût che o lassavi i miei prin 25 agns a lis spalis, e dut chel che o jeri , e ce che mi vevin dât, mi varès judat di chi indenant a scugnì cjapâ decisions, che fin cumò, i vecjos di cjase a cjapavin par ducj nô , o soi passât di sotan a paron di me stes, ducj chescj pinsîrs ingredeâts mi son vignûts tal cjâf tun par di minuts, te trate di scjalis smontânt de nâf.

O sint che mi clamin par non, al jere Meni il copari di mio pari cun altris personis che no cognossevi, a dì il vêr nancje di lui mi visavi masse, o jeri frut cuant che al è partît, ducj mi fevelavin, e no dome in furlan, i oms ti saludavin cuntune strete di mans e une pache su la spale, lis feminis cun dôs bussadis, une par ganasse.

Rivâts a cjase di Meni, altre int mi spietave, cualchidun al jere dal paîs, - cemût la vie ? , ducj a volevin savê lis ultimis novitâts des lôr fameis, mi sintivi maraveât e sbarlufît di chest bon acet.

Dai fonts de cjase, daûr di une cise di maruscli si viodeve des personis che traficavin, e si odorave un profum di mangjative che ti stuzigave il stomi, olmant oltri la cise, o viôt une gridele poiade sore une lamiere cun dai cjarbons impiâts, e parsore : une rieste di luianiis fatis su in strecis, cjar di vacje, di purcit, insome ûs zuri no vevi mai viodude tant e dut insiemi.

Un par di dîs dopo o tachi a vore cun Meni, al jere rivât a cumbinâ une piçule dite cun altris dal mistîr, o vivevi a cjase sô, cun lui o levi imparânt par ben la profession, a la risultât sei un bon mestri par me.

Une dì al dîs cal veve di fevelâ cun me, par un pâr di oris o soi restât in spiete curiôs, rivât a cjase e sentàs sot il bersò , cun tune butilie di vin e dôs tacis, al tache disint: – Pieri, a to pari i ai prometût che o varès viodût di te,

ti stimi unevore, tu as lis mans di aur, o pensi che al è rivât il moment che tu cjapis in man il to destin.

----------------

Storiis...e...Storiutis 9

2010-05-29T05:15:00.000-07:00

Mi cjatavi tun bastiment che à mi puartave viers

Buenos Aires, Argjentine.

O vevi pierdût la busule, dal timp che al jere pasât, dopo vemi imbarcjât un misdì a Gjenue, o calcoli une ventine e passe dîs, co ai saludât i mei , sul puarton di cjase, e pûr mi pareve che al fos passât plui timp, pes tantis robis che o vevi viodudis, ta che trate di percors.

Mi jeri distirât suntune brandute a cjapâ soreli sul puint de nâf,o vevi sierât i voi, tant il panorame che o viodevi devant e daûr di me al jere simpri chel, aghe par sot e cîl parsore, come se la imbarcazion si fos fermade tal timp, tun puest fis, dut mi jere di famee e al stes timp scognossût, o sintivi dentri di me, une pas che dome e rive a datile, chê fuarce di volontât che a si met par razonzi l’obietîf.

Mi soi indurmidît cul rulament de nâf, fasìnti dai siums ingredeâts, che no vevin nee cjâf nee pît, di colp si mi presente in ment, co stin tornânt indaûr cul mio amì a dute corse cul saret, fermantinus devant il puarton di cjase, in cjamare lente o viôt cori viers di me, la mame, lis mês sûrs e dut il rest de famee, a mio pari no lu viôt di nissune bande, o sint une vôs che mi dîs :

- a le a vore tai cjamps,… taaii ciaampsss…...

- Pieri, Pieri, jo o alçavi i braçs viers la mame: - Pieri, Pieri -

di gnûf, une man mi scossâ la spale, al jere un mio compagn di cabine che mi cjalave, e mi dîs :

– no âstu sintût il campanel di clamade a gustâ - ?.

Lu cjalai imbambinît, scossât di chê vision de me famee, cjapât subit cussience di dulà che o jeri, cuietânt chel discjadenâmint visîf di situazions, lant daur dal mio amì.

Doman o saressin rivâts a destin. Za si començave a viodi cualchi cocâl svolânt, pojantmi une man sul zerneli, o rivavi a viodi une linie di tiere, sigûr il copari dai miei mi spietave te stazion maritime, mi sintivi dut sotsore, jerin passadis tantis robis in pocs dîs. Si steve vierzint une svintule di novitâts, o jeri ansios dal gnuf, o volevi strucjâ il mont e tornâ a falu su.

Ma dome Diu saveve, ce che mi varès risiervât il destin.

-------------------------

Storiis...e...Storiutis 8

2010-05-22T08:33:00.000-07:00

Un amì mi varès menât ae stazion dal tren cul saret.

Rivade la zornade o fas un zîr saludânt a lis personis, ai puescj, dulà che o jeri nassût e cressût, o volevi puartâmi cun me, lis ultimis visions dal paîs.

Al saludâ i nonos ur ai dit alc fasintmi il braurôs par no clopâ devant di lôr, ju ai viodûts vecjos di colp, come se la mê partence ju ves metûts denant di une evidence clare, che za o decidevi par me stes, mi vevin cocolât, ogni don te sô maniere, la none preparantmi des pitancis, che mi plasevin, il nono menantmi pai cjamps, a viodi i nis dai ucieluts.

Rivât il moment di saludâ mê mari, si sin cjalâts dantnus un abraç che nol finive plui, e veve un temperament fuart, no jere di mostrâ i sintiments, ma se veve di difindinus, e mostrave lis ongulis.

- Mame ti mandarai il biliet ! tu vignarâs a cjatâmi – a jai dit.

I miei fradis, issint zovins, le an cjapade sul lizêr, mio pari no lu viodevi di nissune bande, al jere partît tai cjamps, mi diseve il cûr che nol sarès rivât par saludâmi, lu vevi capît îr sere, cuant che dopo cene sentàs sul muret, su lôr de strade, al à fevelât come mai lu veve fat cun me:

de sô zoventût, di cuant cal morosave cu le mame, de gole che al veve di ve un fi mascjo, dopo dôs feminis, al nono jere sucedût de stesse maniere, issint mio pari il tierç fi dopo di dôs sûrs.

So pari, al veve fat lu stes che lui , cuant che la comari ur veve dit dai mascjuts, i doi e son lats di corse te ostarie a bevi taiuts cui amîs, tornânt a cjase dome sot sere, plens di orgoi e di… alc altri.

D’un trat cjalantmi in muse mi dîs – Pieri, o sint un poc di frêt -,

e segnalantmi lis montagnis ca si viodevin lâju , lis cimis sblancjadis di nêf, mi dîs: - o stin lant viers l’Invier, a le miôr che o vadi a durmì.

A son stadis lis ultimis peraulis, co ai sintût di mio pari.

------------------

Storiis...e...Storiutis 7

2010-05-14T15:05:00.000-07:00

Cun tun fradi di cualchi an plui piçul di me, o judavin al pari te campagne che a nus jere restade, o vevin ancje des vîts che bisugnave curâlis, insedâlis , vendemâ , pescjâ la ue, folâ, e altris facendis.

O vevi novitâts di paisans che jerin in Argjentine, o savevi che ur leve ben, lavôr an’vevin, anzit un copari dai miei paris, mi veve fat savê che so decidevi di la ju, mi varès dade une man, us zuri che no ai durmît par une setemane, decidi, a le facil dilu !!

Lassà i vecjos, i miei fradis pocs agns ancjemò, a saressin stâts in cundizions di cjapâ in man l’andament de barache.

Une dì jerin sentâts ducj a taule, o tachi il discors, a devin vemi viodût decidût a dut, i argoments a jerin plui che onescj: lavorâ e lavorâ, cirint di judâju il plui pussibil, mi cjalavin come se no mi viodessin.

La none che di solit e jere di fevelâ, cheste volte no a dite ni ghets, a me mari jai viodudis dôs lagrimonis cori ju pe muse, mio pari al rive a dì: - e i bês pal biliet ?

Il nono, impiant la pipe (no soi mai rivât a capì ce che al meteve dentri) le lât a sentâsi tun muret in curtîl. Lis ideis confusionadis e un grop che nol leve nee su nee ju, no mi an lassat durmì, ancje pal fat che o vevi scomençât a fevelâ cun tune zovine dal paîs, nuie di seri, no mi jeri lassât la cun nissune peraule di plui.

La domenie prossime, o stevin gustant, o viôt mio pari bevisi une tace di vin tun flât, e sclarìnsi il gargat mi dîs: - Pieri, a le rivât il moment di meti neri su blanc, o vin decidût di fevelâ cul Sensâr e vendi la Rose, cul rigjâf o fasin il biliet pal bastiment.

Il copari ti mandarà “l’at di clamade” come prometût. Orpo ce di ! Di solit, in famee no jerin di fa grancj discors, cjapade une decision, si jere ducj dacuardi, e cussì e je stade.

Si jere in Sierade cuant che o soi partît, la mame tra un suspîr e chel’altri,

e leve preparantmi la valis.

----------

Storiis...e..Storiutis 6

2010-05-08T08:47:00.000-07:00

I an ufiert un cafè di vuardi e un bicjerin di sgnape, si metin a fevelâ dal mês di Mai, dai rosaris, des novenis e di ducj i preparatîfs di chest mês Marian, za che la glesie a jere dedicade ae Vergjine Marie.

La sielte “di cui par cui” le veve fate il Plevan, cognossint a lis zovinis in cuistion, Tine la plui minudine des dôs, le a mandade in France, za che no veve di la pai cjamps a vore, Gjise in cambiio e veve un’altri personâl, se veve di la daûr de vuarzine, o cambiâ lis schiânuses dal jet des vacjis no veve pôre, al podeve stâ content chel’om dai cjasâi.

Tine, cuindis dîs daspò a si je sposade, partint pe France subit cul sô marît, za che si finivin, lis feriis lavorativis ca i vevin dât sul lavôr.

Gjise si je sposade dopo che so sûr e veve cjapât il tren par Parigji, volìnti compagnâle fin l’ultin moment, a jerin une vore unidis.

Une volte cjapade cussience de situazion dentri de famee, bisugnave che ognidun dai soi integrants al modificas tun gnûf asset, come par “sestasi”, onzi la ruede, par che la famee dute a podêti rodolâ par ben.

La cjamare di jet des dôs maridadis, e jere passade ad’altris dôs sûrs, zimulis in cressi, fin cumò a vevin une cocjete te cjamare dai nonos, il displasè de partence des sûrs no la durât tant, a vevin la novitât di une cjamare dute pâr lôr.

I lavôrs di cjase si levin fasìnti pesants pe mame, che za no veve l’aiut des maridadis, ancje je e veve i soi agns, de none, no si podeve pretindi nui’altri, dut il dì a traficave in cusine, lis zimulis a vevin buine ande tal judâ, di li a poc timp, a saressin stadis des validis colaboradoris de mame.

Da un poc di timp a cheste part, mi jeri metût tal cjâf, che se no cambiave la vite par me, o sarès simpri lât cui solits sburts e sdanzs, o viodevi che i agns a passavin, no rivavi a cjatâmi un lavôr di permetimi di organizâ la me vite di maniere diferente, mi rangjavi a fa alc di muradure, judant un mio barbe, ma dut li.

....................................

Storiis...e...Storiutis 5º

2010-04-30T12:46:00.000-07:00

Tal câs des mês sûrs, e je une detule in paîs, che dîs:

Il siôr nol va, il puar nol’olse, intant la marcjanzie e polse.

Domenie stade dopo messe grande, o viodin jentrâ tal curtîl nie mancul che il SiôrPlevan, une vere sorprese par ducj, mancul (mi a parût) che pes mês sûrs .

Riverît a dovè lu fasin jentrâ tal tinel, une piçule stanzie risiervade pes grandis ocasions, sentât che a le lui, lu fasin ancje i nonos, i miei paris, e lis mês sûrs Adalgjise e Martine (lis clamavin la Gjise e la Tine) ducj chei altris tal curtîl cu lis orelis spiçadis no pierdevin gote di peraule.

Il Plevan che al saveve cemût zirâ la fertaie par che no si brusi, si mande a discori dal parcè che al jere vignût in visite, cuntune locuzion ben metude adun, someave che al stes leint il vanzeli,fevelânt e laudânt a doi oms.

Un al jere stabilît in France za da un biel pocs di agns, chel altri al viveve passant la Sfueime tai cjasâi disore, chest ca al veve cjamps, bestiis e cuatri fruts, l’ultin di pocs mês.

Il Francês che al veve un bon lavôr stabil tune feriere, une cjase no lontanon di Parìgji, di non Mont…..e no ai capît altri, ah… e trê fîs, che levin a scuele, ma in cjase, e chi il plevan a i deti impuartance al fat che: si fevelave dome furlan.

- Ah…benon - e dîs la none (pensant come in alc positîf) .

Gjise e Tine no alçavin i voi de taule, alc e dovevin savè, e jerin saldo in glesie, mi a parût che vevin cumbinade dute cheste facende cul siôr Plevan, che finide la sô filipiche, une des miei predicjis dai ultins timps, al dîs:

– chêi doi cristians , e son restâts vedui cualchi mês fa, e cence tirâ flât viodìnti che la mame e steve par diti alc al zontâ:

– e sarès une opare di ben, viers chestis personis e lis lôr fameis, oltri dut une sistemazion (e cjalant aes mês sûrs) di chestis dôs zovinis. Ca vegnin a cjatâsi, par volontât dal Signôr,

(e cjalant une stampe di Madone di Mont, picjade tal mûr)

- e de sô e de nestre tant venerade Mari, cun tune famee

che ur darà contenzion e protezion -.

.......................

Storiis...e Storiutis 4º

2010-04-24T05:08:00.000-07:00

L’Americhe nus faseve cognossi lis sôs modis, tal mangjâ, te musiche e tantis altris.

Cheste gnove gjernazie di “Gionis” a son jentrâts te simpatie de int dal paîs, sedi pai spagnolets “Camel o Cherstesfield” pai fumadôrs, pai fruts e feminis, la cjocolate e il “Çiunga”, dut il paîs al mastiave, al supave, al fumave.

Il passaç dai Todescs ai Americans, in cierte maniere le stât positîf, ancje te procreazion, la peraule “OK” a jere al’ordin dal dì, si la sintive dapardut tant dai “Gionis” come dai Furlans.

Une dì in place, un pari di famee avilît, stufât, sbrocantsi cul mont, cu lis vueris si lu sintî berlâ –Ok, Ok, okêi okialtris, intant me fie a je….e spiete un frut.

A cjase mê si leve indevant come al solit, no jerin stâts cambios di impuartance pal moment, si, e chest al va dit o vevin pierdude che sudizion co vevin fin a pôc timp fa cul Todesc, ma di lavôr no si fevelave, bocjis par disfamâ a n’derin masse, che pocje tiere co vevin no rindeve.

Il stabil in gjenerâl al veve bisugne di lavôrs di muradure, ma no jerin becs par podê fâju.

O vin savût che cualchi pari di famee dal paîs al jere partît, si sintive a fevelâ de Argjentine, dal Canadà, e di altris bandis, ducj a vevin cualchi lontan parint o cognossint, che ai vevin mandât “l’at di clamade” cussì a disevin, e che dopo un par di agns a fasevin la ju dute cuante la famee, timp fa une femine cun doi fruts, che viveve disot cjase nestre, a jere partide par razonzi il sô om, e cussì a fasevin altris.

Ce cûs contarai cumò, a val propit la pene di sintî, in cjase sin restâts ducj a bocje vierte de sorprese. No crôt veus dite mai co ai dôs sûrs plui vecjis di me di cualchi anut, jo o soi vignût in chest mont dopo di lôr, cuant co soi nassût, lis mês sûrs a zuiavin cun me come co fos un pipinut.

Fin cumò a no vevin vût sorte di cjatâsi un bon marît, in paîs nus tignivin par une famee ben posizionade, di ciert rispiet, ancje se cumò economichementri lis robis a levin no tant ben, o vevin vût timps miôrs.

-------------------------

Storiis...e...Storiutis 3 part

2010-04-16T14:13:00.000-07:00

Un spetacul de nature, cence lis leçs dai umans. Dopo ca le mont a je simpri lade indevant cu lis sôs propits normis.

Il nono al cjalave che caravane di poleçuts che parevin stupins di coton ca piulavin, scurementri ce ca la dite, al jere prodot di ducj chei agns di esperience cu lis bestiis, e cjalant la none al disè:

– cemût ise, se tal curtîl no le nissun gjal ?

E la none, par alc a veve i agns ca veve, mi par di viodile, ja fat une riduçadute sot vie, sedi al viodi dut chel ben di Diu, o par cognossi la nature des robis.

Cussì a levin passânt i dîs, une biele matine il paîs si svee cun tune novitât, l’invasôr vie pe gnot al jere partît, i aleâts e avanzavin, si veve vût il nulôr che saressin rivâts da un moment a d’altri, sul stradon la int a jere su l’ôr de strade, ancje se cu la pôre dal scognossût, a smicjave, se viodeve cualchi convoi cal vignis su de citât.

Di bot si sint un a berlâ, al jere postât tun barcon dal cjast di une cjase

– Veju, veju a rivin, difat in zornade si jerin bielzà instalâts, ai vevin ufiert lis miôr cjasis, ancje il Cjistiel la su adalt, al jere dut un vie vai di “Gjips”, a jerin americans, ancje cualchi neri.

In pocs dîs il paîs al veve cambiade muse, come cuant che si cambie stagjon. I mucs si jerin puartâts daur cun lôr: la Sierade, la nestre pôre e la musiche di Wagner, cui americans pareve fos rivade la Vierte, ancje la musiche il “bughi bughi” al dave ligrie.

Lis ostariis e tornarin a lavorâ, i gnûfs aventôrs ca clamavin “Gjioni”, ancje se ur plaseve il vin, a scomençarin a vê pretesis americanis, a planc cualchi ostîr le lant cambiant l’insegne parsore de puarte “Ostarie dal Çus, Snak Bar, Juke box”.

Te locande “Al bon tai” a fitavin ancje des stanziis, adiriture a fasevin dai panins cun tun ûf frit ae cjamese, valadì, cuant ca frizevin l’ûf, cu la sedon i butavin parsore vueli cjalt, ca cuvierzeve il ros cul blanc, no savès l’esit che an vût, un cartelon fûr de puarte, al diseve:

“sandwiches with fried eggs”, panins ai ûs frits.

-------------------

Storiis...e...Storiutis 2º part

2010-04-09T12:44:00.000-07:00

Prin de vuere al jere il miôr gjalinâr de borgade, cun dutis chês besteutis, plui di une si meteve a covâ, e un biel dì, tu viodevis la vuede spassizant la sô prole pe arie, il pulinâr al someave une famee organizade.

Ognidune a conservave un puest te scjale jerarchiche, il gjal come cap di famee al jere il caporion, dut jere pas, fintremai cal subentrave un’altri , un gjalut de stesse famee cal jere cressût lì, e al voleve ocupâ un puest.

Par cumò di gjai and’ere un, no’n si viodeve altris, par ordin ca si fasevin adults e vignivin sacrificâts pes necessitâts de famee, il vecjo caporion une dì a la stirât lis çatis, muart di vecjo e an dit.

Cussì chês cuatri superstitis, a jerin restadis cence il “chirichichi” invidânt e svearin di dutis lis buinoris, par moments tu lis viodevis cori come matis, stirânt un cuel lunc cence plumis, cul bec viert e la lenghe di fûr, someave ca ur mancjàs aiar, forsit a sintivin la mancjance di alc, di timps miôrs.

Come ca podevin, cualchi ûf a fasevin, bisugnave cjatâju, jerin scuindûts dapardut, la mame cun sante pazience e cirive di cjatâ lis gnovis covis, ogni tant le viodevi tornâ, cul griimal tiradis su lis pontis cun dentri dai ûs, che sere la taule si parecjave, graciis, a chês cuatri besteutis di Diu , o vevin fertaie cu lis patatis e cevole , la polente tal mieç de taule ca fumave, la none a meteve ancje un bocâl di vin, nol jere di ducj i dîs, ce ca si cjatave te dispense, al vignive dosât come ca fossin medisinis, e nô dai malâts.

E jere la none che ca veve la clâf dal camarin, nissun podeve jentrâ, il nono, di simpri ai veve lassât a je cheste incombence, al diseve - lis mês mansion a scomencin dal difûr de puarte, dentri cjase a je robe di feminis, nol voleve impaçâsi, tante salût al diseve. Une Une dì a buinore sintin berghelâ la mame tal curtîl,

- vignît, vignît ducj, o viodin un spetacul che, da tant timp il curtîl al jere vuarfin,

une des “Padoanis” e vignive indevant braurine e supierbeose, cun tune rie di poleçuts,

someave volès mostrânus la prole, di tant che badascolave cjacaradice,

intant che sgarfave il teren in cercje di alc par becuça.

----------------------

Lis imagjinis a son cjoltis te web

Storiis...e...Storiutis

2010-04-03T07:01:00.000-07:00

Chestis a son “Storiis…o…Storiutis “di fameis, di personis, che apene finide la seconde vuere mondiâl, e an dicidut di la pal mont, in cercje di un miôr tenôr di vite.
A po sedi la to storie, la mê, o chê di cualsisei vicin di cjase.
----------------------------------------------

Si jere tai ultins moments di cheste grande conflagrazion, il paîs si cjatave tal mieç de cuistion, i todescs a jerin in ritirade, cuant che un al scjampe, di solit a le simpri un’altri ca i côr daur.

Lis scorsadis dai aeroplanos a jerin al’ordin dal dì, no si jere sigûrs di nuie. La miserie da timp e veve cjapât pît dapardut, il marcjât neri al trionfave, i bês a jerin tes mans di cuatri marcjadants, che cjale il câs, ur va ben in timps di vuere.

Lavôr no si cjatave, ancje se a nd’ere tant di cefâ so fevelin di muradure, cun dut sdrumât, bastave cjalâsi atôr, ancje lis vacjis scugnivin durmî tal bearç, si jerin salvadis par miracul.Pieri cuant cal sintive ca podevin sei des incursions aeris, lis lassave libaris dentri de stale, cu la puarte dal ronc vierte, lis bestiis e an un sens cal va oltri a di chel uman, e sintin il pericul, la stale pûr a jere colade, ma par fortune la Rose la Blancje e la Nine, si jerin salvadis.

Une des tantis bombis e jere colade te braide, dut il circondari al veve vût dams, li di nô, la stale e part de cjase a vevin vût un daneç di considerazion, par fortune nissune pierdite umane, o animâl, l’obietîf e jere la “vile”, li ca si cjatave il Comant Militâr Todesc.

In famee si jere in masse, cuant ca rivave l’ore di metisi a taule, che detule chê dîs, li ca mangjin doi a mangjin trê, domandaiti ae puare mame che no saveve plui a ce sant avodâsi.

Gjalinis, tal curtîl a nd’ere restadis chês cuatri, che si rangjavin cul mangjâ e dut il rest, ancje par lôr i timps a erin di magri.

----------------------

Cheste conte a varà continuitât.

La podine di me agne 2º e ultime part

2010-03-26T16:14:00.000-07:00

Lant indevant tal timp, il curtîl tes oris diurnis al jere simpri plen di fruts, e.no dome de stesse famee, tune cjase dentri dal stes curtil o vevin dai cusins, podarês dome imagjinâsi, che ancje tra i fruts si inmaneave cualchi barufe.

Simpri cualchi zenoli scusât, a vignivin cuasi subit separâts des rispetivis maris, e secont il dan cal veve ricevût il frut i davin la colpe a di chel altri, joissus se si viodeve dal sanc po, za a jere robe di clamâ i carabinîrs, afârs di maris .

E cumò o rivin ae podine di me agne, che cjape il titul cheste storie:
Tal ronc daur cjase, dopo passadis lis stalis e jere la lissiarie, la stanzie li che si lavave dut il sporc, li stes si scjaldave l’aghe cun fûc a lens.

Me agne Nene che si sintive un poc la mari di ducj chei fruts, si veve cjapât l’impegn di fâur fa a dute che canaiade un bagn setemanâl , la sabide tor sere, une grande podine plene di aghe cjalde a scomençave a ricevi il prin frut, si leve dal plui piçul in su, ad ogni don cal passave si zontave un seglot di aghe cjalde..

Cuant che rivave ai plui granduts, la gnagne Nene ai lavave dome la schene, podopo si ocupave di altris voris, intant che il frut al finive di lavasi bessôl.

Jo o jeri simpri l’ultin, o lavoravi te buteghe di mio barbe, une volte ca si le sierave, o jeri libar di la a fami la mê imersion setemanâl.

Al jere plui fuart il desideri de podine, che la sbigule di traviersâ il ronc a scûr fin a rivâ ae lissiarie, che le cjatavi simpri riscjaldade dal fûc ancemò impiât, dantmi ancje il lusio di cambiâ l’aghe de podine che si le viodeve bielzà di un colorut maron.

Cui che no la vut une gnagne Nene cal alzi la man.
Sa la gust di famal savè, che mal disi, cun plasè lus scoltarai.

-----------------------

La podine di me agne 1º part

2010-03-20T06:11:00.000-07:00

Le clamavin “Nene”, a jere me agne par veti sposât un fradi di mio pari, e come ca jere usance, il nuviç al puartave la nuvice a cjase sô, rarementri si dave il cas contrari, che il spôs al les di cjase la di je, chest al compuartâ cal vignìs clamât cuc, come chel ucielut, che si instale tun nît ca no le il sô. La societât de epoche a diseve cal veve di sei l’om a proviodi il tet.

I nonos e vevin sis fîs vifs, in’derin muarts doi, cinc fruts e une frute, di chel che jo mi visi , trê si jerin sposats puartant la femine te cjase paterne,

il cuart al veve sposade une taliane e al jere partît ae volte de Capitâl,

il cuint sposât cun tune dal paîs, a son lats a vivi vie pe Italie, la frute no si jere sposade restant in cjase.

E ca bisugne fa une riflession sul vivi ducj te stesse cjase, metêt insiemi: une mari, une fie e trê brûts, in totâl cinc feminis cun tune convivence zornaliere, volênt o no cualchi scaramuce simpri a cumbinavin.

La mari e veve la cusine tes sôs mans, e lis cuatri cugnadis, dut il rest, la cjase a jere grande , oltri ai marîts di ognidune

e vignivin i fruts, ogni nûf mês al rivave un, il prin a le dal ’32 e l’ultin dal ’46.

Si jere rivâts a sei une ventine in famee, tra grancj e piçui,

mi visi benon che si cenave in doi turnos, adore i piçui, e plui tart i maiôrs,

in cusine a jere une taulone grande e lungje, e separade a jere ancje la clamade cusine sporcje, li si lavave la masarie, e tun stanzinut al jere il camarin, cui salams picjats e cualchi piece di formadi.

Tal mieç di cheste grande cusinone il fogolâr cun altis cjadreis zirant ator di lui.

Cun tun grues çoc impiât cal scjaldave, mi divertive butai cualchi grignel di sal grues, tal scur de cusine dome cul losôr des flamis e sintìnt sclopetâ,

e viodint lis faliscjis ca levin adalt pierdintsi tal scur dal cjamin.

--------------------

IL PARI 2º (ultime part)

2010-03-13T02:50:00.000-08:00

Us contarâi ce cal veve dit a l’inizi, i Todescs in ritirade a jerin rivâts in paîs,

recuisint la cjase di so nono, il lûc si cjatave tune buine ubicazion, fûr a passave la vie Nazionâl, dentri tun curtilon a vevin lis lôr machinis, te plante basse de cjase a faserin il cuartîr Gjenerâl.

Sigûr che nol jerin onôrs veju par cjase, anzit un disturp. La none, cui soi agns e no podênt cjaminâ, le vevin sistemade in cantine cun ducj i nevôts, a nd’ere une cjamade, i plui piçui si divertivin, saltant sui materàs in file.

Il pari pûr al jere stât recuisît come interprete, al fevelave todesc, al veve di furnîju di cafè, brut e altris, ogni tant al capitave ju (in cantine) a puartaur alc, ancje se ur veve proibît ai fruts grancj comparî disore, no i fasevin câs, volevin viodi, savè ce cal sucedeve, la cantine a veve barcons a nivel strade, e chel poc che si podeve viodi , a jerin stats taponats cun grandis pieris, la pôre ca vessin bombardât il stradon, par fa dificil al “muc” la ritirade, e varès podût fa dan la onde espansive .

A dusinte metros , a jere za colade une bombe , lis muiniis si jerin salvadis par miracul ,

fortune che un pâr di trafs sincrosarin, lis an tiradis fûr vivis e a salf.

Bisugne ancje dì alc dai partigjans, a jerin une vore atîfs,

tai lôr moviments, simpri cualchi scuintri cui mucs, il mal al jere che fasint fûr un todesc, par svindic a metevin al mûr 5 civîi, si po viodi vuê, tune paret dal cimitieri, lis busis lassadis da lis balis.

Une dì fûr dal puarton, a jere parcade une jeep, sore al durmive un cruc, il pari s’intivave a sei li, al viôt rivâ un muc, lu cjalâ ben in muse, a si deti cont cal jere un dal paîs, cun uniformi todesc, al progjenitôr si son dreçadis lis orelis, e i cjavei, al va viers di lui, e i dîs:

- la crodistu di lâ zimul ? al jere un zovin sui 25 agns, decidût a puartai vie la pistole al todesc, cence nancje pensai al macel cal varès provocât, il pari cualchi an plui vecjo di chest, lu slontanà un poc e seriementri i dîs.

– sparìs, se no ti denunzii, te cantine a je me mari e la famee, tu varâs di fami fûr prin a mi -.
Il fradi , (je a contade in chescj dîs) al jere platât li dongje e a la podût sinti dut,

il zimul viodìntilu cussì risolût, a la fat dietrofront sparint de viste.

Podês nome imagjinâsi ce cal varès podût sucedi.

----------------------------

IL ZAGUT 5º

2010-02-05T14:02:00.000-08:00

(cuinte, e ultime pontade)

Une funzion…particolâr

Ce co contarai cumò no ricuardi sa le sucedût a mi, o pûr se lu ai insumiât, o soi sveât cuant che me mari e voleve vierzi la puarte dal tinel (sierade a clâf par dentri) berghelant co i vierzès imediadementri, so pene di butâ ju la puarte, ma parcè tant casin?. Si stavije brusant la cjase?

-------------------
Vierte cheste benedete puarte, ce vino mai viodût, i mobii dal tinel, di solit formât da une taule cun lis sôs cjadreis imbotidis, un mobil cal contignive platarie, parsore un spieli dut a dilunc cun tune biele curnîs dorade, doi cjadreons cun tun piçul taulinut, parsore al veve un abadiur.

----------------
Contade cussì al sarès stât dut in ordin, invizii vierte la puarte si viodè la taule, lis cjadreis ritiradis cuintri une des parets (pâr fa plui spazi), parsore dal mobil al jere stât metût a dilunc un biel mantîl di puntine, che in cjase lu metevin dome cuant cal vignive di visite cualchidun di rivuart, il spieli cal pesave no sai trop, al jere stât gjavât dal so puest, e poiât tal paviment di len cuintri la parêt, tal claut al jere stât picjât un biel cuadri de Madone dal dêt cul Bambin.
------------------
In ogni estrem dal mobil une plante, e tal mieç un vâs di rosis taiadis in cualchi ort o zardin di dulintor, al sierave dut chest furniment doi cjandelîrs cjatàs ta cualchi baûl, lis cjandelis impiadis, i scurets sierâts, ancje il barcon, insome si jere formât un clime di glesie, di pocje lus e di rispiet
-----------------
“La mise en scène” e dave il sô efiet, mancjave la musiche di fonde, e come tai siums dulà che tu passis da une situazion a di che altre, di colp o vin sintût suns e che cualchidun al sunave une armoniche, acuardis in ton maiôr ca passavin a minôr, al pareve un orghin, cun tune concentrazion interiôr che faseve une vore reâl chê ireâl, un lizêr nûl fumatôs prodot des cjandelis, ti dave l’imagjin di un turibul cal stes brusant incens, no si nulive nuie.
----------------
A chest pont devant de clare evidence di ce ca si viodeve, no le restât altri che ameti, cui cal jere l’autôr di dut chel caos, za mi ricuardi ce ca mie stât dit, o ai capît , co dovevi meti in sest chel davoi, stant atent di no rompi nuie.

-------------

Cussì je finide cheste funzion...A...meennn.....

si sêso mai insumiâts, une situazion come cheste ?
-------------

Storiis...si cjaparâ lis sôs vacancis,

tal "Ferragosto Argjentin",

e tornarâ tai prin dîs di Març.

Ûs da lis graciis a ducj, pe vuestre prisince.

Maman.

-----------------

IL ZAGUT 4º

2010-01-30T05:09:00.000-08:00

(cuarte pontade)

I Donzei

Il ricuart cûs contarai cumò, lu ai te ment e ancje tal stomi, a le un grop che no lu ai mai podût parà ju, cul timp o soi rivât a capì cal podeve sei par motîfs plausibii.

Un par di voltis ad’an si faseve in paîs des procession solenis, une schirie di femenutis sot il comant di une sorestante, in chês zornadis a lustravin, a tiravin fûr sants e madonis, a netavin ce cal coventave par che il dut al fos lusôr e bielece, cualchidune di chês beadis a doveve sei in “odôr di santitât”, pe diligjence premure e passion che meteve te vore, ogni volte ca passavin devant l’altâr, si inzenoglavin e la man diestre e jere dut un moviment fasìnsi dai segnai.

E ca al ven il pont dal mio torment: a vistivin di donzel une dozene di fruts, cun chei biei vistîts di vilut di ducj i colôrs, i bregonuç a la zuave cu lis cjalcis blancjis, i scarpets sfodrâts, la gjachetine dal stes colôr, il basc cun tune plume di fasan tal contor
Cui sa ce storie di cjistiel e cjastelans ca mi vevin contât, o pensavi che i fiis di chescj siôrs, a fossin simpri vistûts di donzel, ore a cjaval, di bot cul brun, o corintsi daur ta chei grancj zardins cerclâts di un alt curmel.
I fruts a vignivin sielzûts a dutrine, e il dì de procession sot un baldachin, fasìnti la scorte di onôr al bonsignôr (cinc par bande), che dut intabarât tun piviâl, e cun tant di guants cul anel pastorâl parsore, al puartave il Santissim su e ju pal paîs, cu lis cjampanis moladis al vint, ricevint rispueste da altris cjampanili vicins.

A chest pont mi disevi: o fas il zago, o cjanti tal cor, o voi daûr dai corteus di funerâl, di nuviçâl, o puarti la Crôs tes rogazions, ce altri podevio fa, ma mai ca le mai mi an contentât, mi leve l’aghe gole di vistimi cun chei biei abits, dut câs a podevin dami cualchi esplicazion, di ce ordin, !! se jo no ai mai fat peraule su la facende !!!

Ce cûs disevi al’inizi e varan vude cualchi reson, forsit i bregonuç a mi levin piçui, si sa i fruts a cressin e i vistîts no.

-----------------------

Lis imagjinis a son cjaltis sul web

IL ZAGUT º3

2010-01-23T03:01:00.000-08:00

(tierçe pontade)

Jo o fasevi il garzon di buteghe, il paron al jere mio barbe,

fradi di mio pari.

Une dì di setemane a buinore o viôt jentrà di buride il muini, (i nulivi intôr simpri un odôr a cjandelis studadis a man).

Come che nol jere client i pensi, ce volarâl cumò!, difat a mi diis, bisugne che tu vegnis cun me “ipso facto”, a le di celebrâ un matrimoni, za, no mi a lassât co dîses lis mês, mi ribat – no vin cjatât nissun altri, cussì che, i domande permès al paron che mi a parût ca la dit di si par nô dì di no.

Mi soi gjavât la gabane grise, e i diis di lassâmi la a cjase a cambiâmi, nuie di fa, za si sintivin sunâ lis cjampanis cun chel dindonâ a messe di gnocis, plui di cualchi vecjute no si sarès pierdude une ocasion come cheste, cjapâ messe e viodi i nuviçs, un matrimoni come un funerâl simpri a tiravin dongje int, par curiositât o par altri.

Rivâts in sagristie juste il timp di vistimi e metimi la tonie di zago, il celebrant al jere bielzà pront, e mi dîs – su,su svelt ca le tart, al someave cun dut rispiet un cjaval di bataie cal mastiave il smuars, si viodeve cal veve premure, o jessin pe puarte de sagristie, e come une bugade di aiar si cjatin denant dal altâr.

E chi a scomence il mio calvari, tai piis o vevi un par di çuculis cence suele di gome, podêso imagjinâsi che a ogni pâs co fasevi al jere dut un toc, toc toc, o cirivi di alçâ i piis plui co podevi, cul stes risultât, toc,toc,toc, no podevi svolâ, o cjaminavi a cjamare lente lant su e ju pe scjalinade dal altâr, sal colave il messâl al sarès lat a finì jenfri i piis dai nuviçs.

Il predi mi butave ogni tant cualchi olmade di traviers,

finalmentri o sint “ite missa est”.

Jo i rispuint “a Deo gratias” no ai mai sudât tant in vite mê.

Il suplizi al jere finît, il copari dal’anel al vignive viers di me, ce volevial cumò !!

brâf, brâf mi dîs dantmi une pache su la spale e metintmi cualchi lire in man

---------------------

" IL ZAGUT "

2010-01-16T04:33:00.000-08:00

(seconde pontade)

Il zago in funzion…tes funzions.

Cui altris zagos si cjatavin te sagristie, soredut tes messis grandis, li cal coventave plui di un, ducj o vevin un incaric diferent, chel cal puartave il messâl, un altri il turibul, al jere chel che plui mi plaseve, cuvierzimi di incens e nulî ta che fumere chel bon odôr, un tierç cul contignidôr de aghe sante, di celebrants ancje and’erin variis tes grandis ocasions, in che dì si jemplave la sagristie di Bonsignôrs, Capelans e Zaguts, nô o cjalavin ducj chei moviments de vistidure di chestis personis, che a mio mût lis viodevi cun tante sudizion e rivuart.

Dôs peraulis su la vistidure, dut une cerimonie viodìnle sot l’aspiet religjôs, a vignivin judats da cualchi cleric tai diferents grâts, codificâts tun cerimoniâl di costums , di usancis .

Il predi tant che si vistis al va disint lis preieris propiziatoris, al si presentarà devant l’altâr cul sô “Introibo ad altare Dei” al evocâ il sacrifici de crôs, il martueri dal “Golgota”,a testemoneantse di ce che nus an dit a partì de scune.

Dutis lis parts de mude e an un lôr precîs significât,

come ancje i colôrs cui lôr incjastris di pieris a lusignutis.
Il sun dal orghin spandintsi par ogni cjanton, al invide ae riflession sul misteri di chê muart, vignude a rediminus.

No sai parcè, ma ind’dì di vuê a ju paragoni cu la vistidure di un “Toreadôr”, cui ca la viodût cualchi cine sul teme, al pues ancje capì ce che an in comun chescj doi rituâi.
Il toreadôr a le di une religjositât laiche, no pâr chest mancul di crodi, ancje lui a la une crôs picjade te stanzie li ca si vistîs, e a ogni toc di abit cal si met sul cuarp, si met in zenoglon domandant il miôr tal incuintri cul “taur”. La montadure de vieste dai efiets luminôs ca produsin i colorâts trindui e perlutis che lu bilisiâ, si trasforme sflandorôs al ricevi i riflès dal soreli.
A je une fieste di colôrs e musiche, un “ole” ad ogni pas di danze, di doi sogjets, un uman e une bestie, che cirin cun dut dirit di difindi la proprie vite.

Ce àno in comun i doi rituâi ?, forsit nuie, ma ducj i doi si stan preparânt par une cerimonie, e si direzin, a un stes “Ent” superiôr.

-------------------

" IL ZAGUT "

2010-01-09T03:24:00.000-08:00

(prime pontade)
Bundì a voaltris ducj,
a je la “storie” di un zago,
che pâr sei un frut
lu clamarin, "Il Zagut".

ZAGUT, ( frut che al jude il predi intant des funzions )

O jeri frut che mi soi metût a zago, e mi plaseve ancje cjantâ, lu fasevi tal cor de glesie, pe mê zovine etât o vevi la vôs “blancje” cussì o cjantavi la stesse melodie des contralt, o jerin in trê zovenuts, forsit piçulis vôs, ma metudis tun contest corâl a si fasevin sinti tai acûts, soredut si rivave a cjapâ su lis notis altis cun dai falsets ca levin drets al cûr,

ti vignive ogni pêl un pan, nus disevin che cjantânt someavin trê agnui, amitint ca cjantassin,

in canoniche o vevi viodût une stampe, ca sunavin des trombis lungjis, come chês de Opare “Aida”.

Nus direzeve Pre Luigji il Vicjari de parochie, om sclet e di pocjis peraulis, cuant cal diseve une e jere chê juste, le mandave drete al bersai, al leve ancje a oselâ, al veve dôs gabanis, une di fieste e une di dîs di vore, cheste ultime po a faseve pietât, e veve ancje cualchi piçule sbrignade, ma a lave ben pai soi lavôrs.

Sul Vicjari o podarès fevelâ un cjapitul intîr, al sarà par un’altre volte.

Tornant al cor, si faseve provis, e la domenie si cjantave te messe grande, mi plaseve tant une dal grant compositôr , il predi Laurinç Perosi.

Cuant co finivin provis o funzions, il Vicjari al meteve la man te sachete de gabane, a voltis al gjavave un fazoleton di colôr par netasi il nâs, e altris un vuluç di cjarte veline, dulà cal veve un sacut di cidelis di zucar ai aromis, and’ere al limon, ae mente, e ad altris savôrs, e lis trê vôs blancjis a vignivin premiadis cun tune grampute di caramelis, cuant co viodevin cal traficave te sachete, i trê o vevin la stesse reazion, distirâ il braçs e vierzi la man, se la zornade a jere che juste o vevin il premi.

Lant indevant tal timp, e pensânt a chei trê cjantôrs, no sai parcè che mi vignive in ment il mot dai trê moschetîrs, tant uniformi e armonic, cal jere chel di distirâ i braçs cun tune spade in man, par difindi o difindisi.

Nô invezi par cuatri caramelis…

---------------

IL ZAGUT

2010-01-02T03:24:00.000-08:00

Vuê 2 di Zenâr dal 2010, crodint o no je començade la seconde decade dal secul 21.
Ûs fâs i miei miôrs auguris di un “Bon Proseguiment”.

Lu fas ancje “Storiis di une volte…”.
-------------
“Il Viaç”, la anteriôr storie, je bielzà finide; i protagoniscj a son za sistemats te lôr gnove realtât, di chi indenant a varan di creâsi une gnove identitât tun paîs, ancje se cun lidrîs Latinis, ma di usancis e prioritâts distintis e une lenghe dal dut diferente.
-------------
A partì de prossime sabide 9 di Zenâr, a contarà une gnove storie: la conte a trate des esperiencis e vicendis, di un frut “Zagut” tune parochie di paîs tai agns 50.
Chel ca la vivût chestis stessis esperiencis come “Zagut”, sicurementri al riduçarà al lei cheste storie.
---------------
“Zagut” es un diminutivo de “Zago”, y contará esperiencias y vivencias de un joven "monaguillo", de un pequeño pueblo del Friuli, de los años 50.

---------------

Ricuarts Furlans...di emigrazion, 16º.me ultime pontade

2009-12-26T05:17:00.000-08:00

Buenos Aires, ai 3 di Avosts dal 1952

"L’obelisc"

Il puint al jere plen di int, ducj a volevin cjalâ sot tal imbarcjadôr cirînt cui vôi a la o lis personis che a jerin vignudis a ricevi i viazadôrs, cualchidun che al crodeve di vele cjatade ta chê maree di personis al berlave cui braçs in alt par fasi ricognossi dal parint, in pocs minuts al jere dut un berghelâmint, un al crodeve di veju viodûts, chel altri a i pareve, ma nol jere sigûr, chest cjalâ il diaul al è lât indevant par une ore cirche.

Pai vosadôrs nus diserin che in file e ordin cui nestris bagais di man o podevin scomençâ a sbarcjâ, cussì al fo, cjatantnus tune grande sale, ancje lì cun pazience a nus forin clamant pal cognon dantnus i documents che nus vevin ritirât la sere prime e ancje i bagais. Fate la dogane tu passavis intun altri salon, e li al vignive l’incuintri cui tiei.

A spietânus al jere gno pari, gno fradi, doi fradis di me mari, abraçs cualchi lagrime – cemût il viaç, cemût stano la vie? -, lis robis che si dîs in chestis circostancis.

Une volte fûr, o cjaminarin cul fachin che al sburtave un cjaruç cui bagais, a cjariarin dut intun camioncin. Po o partirin, o calcoli une buine ore di viaç, simpri dentri de citât.

O ai podût viodi lis varis zonis di cheste grande metropoli, dal cuartîr cun grancj palaçs e grancj condominis, fin ae cjase di gno barbe Olivo, un puest di cjasis bassis, un cuartîr plui popolâr, dulà che o ai cjatât tancj talians e ancje furlans.

O vevi i pinsîr sgardufâts cun dutis chestis novitâts, ancje se za o vevi i pîts in tiere, par moments mi vignive chel inzirli che ogni tant ti capitave su la nâf cuant che si moveve un tic di plui…e chi al finìs un viaç che al durà sedis dîs…

E di chi indevant, e sarà dute une storie…di scrivi.

O speri tant che cheste storie us vedi intratignûts.

---

Ricuarts Furlans di... emigrazion, 15º.me pontade

2009-12-19T05:33:00.000-08:00

Montevideo "Il puart"

ai 2 di Avost dal 1952 .

Al mancjave mancul pal nestri destin, si veve bisugne di meti i pîts in tiere, vaju a capî i umans, ogni biel bal al stufe, cuindis dîs di viodi in continuazion robis e fats gnûfs, o pues dì che graciis a Don Mario o vin cognossût dut chel che us ai contât fin cumò, no nus son mancjadis: lis glesiis, lis madonis e i signôrs, se nol fos stât pal Don, dutis chês citâts lis varessin viodudis di lontan, poiâts su la bandinele de nâf.

A buinore dal 2 di Avost, o sin rivâts a Montevideo, la capitâl dal Uruguay, o lerin a fâ un zîr, lis buteghis a jerin sieradis, e jere domenie, ma no si viodeve nancje tante int. Se le compari cun Rio, mi a someât une citât avilide e grise, lant indevant cul timp, o rivai a capî il parcè des diferencis dai doi popui: il brasilian al è di caratar legri, fevelânt al pâr che al cjanti, cjaminant al pâr che al bali, cui suns tant comunicatîfs de musiche, baste viodi i lôr carnevâi, il clime tropicâl ancje al jude, Brasîl al à ricevût une cuote di africans no indiferent.

L’Argjentin pûr si somee al Uruguayan, i doi popui a àn vût la stesse ereditât dai lôr antenâts talians e spagnûi cui lôr vizis e virtûts. Ancje la musiche di chescj doi paîs unîts dal “ Rio de la Plata”, al è il tango, une melodie malinconiche e sensuâl, cui soi codis e cuntun fevelà particolâr .

Par tornà ae storie dal viaç, dopo cene nus controlarin la documentazion, tal doman a buinore o saressin rivâts a destin. A un ciert pont la nâf e lasse il Ocean par jentrâ tal flum “Rio de la Plata”, lis dôs aghis une salade e une dolce a formin une leande tra lôr perfete, si viôt une linie divisorie dai doi colôrs , une blu e chê altre maron. La nâf e vignive tirade cun doi rimorchiadôrs che le direzevin.

O vin viazât dute la gnot sintint dai stranis rumôrs, e leve plui a planc dal solit par rivà in puart cu l’alte maree, adore o jeri sul puint, volint viodi il nestri vicinâsi ae citât che si le calumave tun nûl di fumate. E daspò di variis manovris si fermà tocjant l’imbarcjadôr.

Si cjatavin tal Estuari dal “Rio de la Plata”.

---

Ricuarts Furlans...di emigrazion, 14º.me pontade

2009-12-12T05:19:00.001-08:00

Santos

"Santuari de madone nere, tal mont Serrat”

(Seconde part)

Jo o impiai une cjandele a cheste madone nere, in sachete o vevi pocjis liris e no vevi cognossimint dal cambi dai bêçs, val a dî di liris a cruzeiros, i mostrai i biliets ae persone disiint “bastino?”, mi dîs di si, cussì o soi rivât a impiâ cheste benedete cjandele.

Cuant che o tornavin in citât, a gno fradi Valter, stant che al veve olmât dai vendidôrs di bananis, ai fasè tant l’“amôr” a me mari, che cun cuatri palanchis a’nd à compradis une dozene, te trate fin ae nâf lis à mangjadis, us conti che durânt la gnot lis a butadis fûr dutis, e tal doman al è stât a diete dut il dì. Figuraitsi che in paîs nô o’nd vevin mai provade une, te compravin cuant che tu jeris malât, “par tirâti su, a disevin”.

Lant indenant cu la storie, si cjatarin cul golf di Sante Catarine, cu lis sôs tradizionâls burascjadis di mâr, o vevin sintût za cualchi discors in merit, sal jere dut vêr si doveve dome spietà e viodi ce che al sucedeve, di fat e je stade cussì, tun ciert moment la nâf e scomençà a balâ…e someave che ves il mal di San Vît…

Par precauzion a proibirin che la int e stes difûr, no si sa mai…a gno fradi e a mê sûr, puarins, ur vignì inzirli e no poderin mangjà nuie, a àn passat cuasi dute la zornade in gabine tal jet, mê mari e jo lu vin sopuartât ben, e jere cuistion di timp, une volte passade che trate di mâr, dut al è tornât ae normalitât, tirânt dilunc viers il penultin puart, al mancjave pôc.

---

Ricuarts Furlans...di emigrazion, 13º.me pontade

2009-12-05T03:24:00.000-08:00

Santos, ai 31 di Lui dal 1952.

“Il canal”

(Prime part)
     Par rivâ al puart di Santos bisugne lassà l’Ocean Atlantic e cjapà un canâl cun chestis carateristichis: 15 km. di lungjece, 150 metris di larc, e une profonditât di 14 m.ts cirche, lis nâfs grandis a vegnin tiradis dai rimorchiatôrs, e planchin planchin e van avanzant fin che a rivin tal puart, che a le ricognossût il principâl de Americhe Latine. Par no pierdimi nuie di cheste jentrade mi soi instalât sul puint, e di li o ai vût mût di preseâ la vegetazion morbide dal panorame di un colôr vêrt che al inceave sot i rais dal soreli.

      Rivâts in puart, simpri cul Don o sin sbarcjàs, si viodeve une ativitât di int e di marcjanzie fûr dal comun.
      Ancje ca o soi restât imbacuchît, sul pedrât des stradis si viodeve une cuantitât di grans di cafè crût, forsi si jere rot cualchi sac cun dut il “via vai” in moviment, int che berlave, int che dave ordins, o ai subit pensât ae bondance di chestis tieris americanis, o vevi apene lassât daûr des mes spalis un pais che al veve vût une vuere, cu la miserie che chescj events a puartin. O stevi cognossint des citâts che par fortune no vevin patît conseguencis belicjis.

Cjamine che ti cjamine, o levin su tune mont clamade Monte Serrat, su l’ôr de strade si viodeve un Via Crucis, rivâts tun plaçâl al jere un Santuari dal 1600, clamât “Nossa Sehnora do Monte Serrat”, la madone che si venere e à la piel scure, di sigûr e je une copie de “Vergjine di Montserrat”, che si venere in Barcelona, Spagne.

---

Ricuarts Furlans...di emigrazion, 12º.me pontade

2009-11-28T04:58:00.000-08:00

Rio de Janeiro

“Crist Redentor”

(Tierçe part)
Cjaminant o sin rivâts denant di une palacine e nus dîs: - cheste e je la sede dulà che al vîf il Nunzi Apostolic -, spiegantnus che al representave il Pape in Brasîl, -puartaitsi ben che o lin a saludâ Monsignôr ………- nol è che no vessi mai viodût un predi di chê jerarchìe, in paîs o vevin un monsignor biel e tont e cuntune fasse di colôr tor de panze, o vevi viodût ancje il vescul di Udin il dì che mi a cresemât… ma cjatâti devant di un personaç dal gjenar, che almancul si doveve dîsi - bon dì !!! - al sarès stât dût diferent.

Une volte dentri, al jere dut di gale, di parade, biei mobii, cuadris di signôrs e di madonis, cjadreis e cjadreons, o sin passàs di stanze in stanze fin che o sin rivâts intun biel zardin, tal mieç un grant e alt scjaipolon cun dentri uciei di ogni fate e misure, par fin papagai dai colôrs vîfs, plantis tropicâls, cualchidune cun flôrs che no vevi mai viodudis, une pas e une trancuilitât ancje so jerin in plen centri de citât.

Pôs minuts dopo velu rivâ il monsignôr…un bocon di om alt ma no tant grues come altris, si, ancje lui al veve une fasse colôr rosse parsore de sotane nere, cuntune file di botons ros che a levin dal cuel fintremai ai pits, me mari al saludâ e dîs – Riverît -, jo o rivi apene a dai la man e no mi visi so ai dit alc altri, nus a fat des domandis, e ditis dos peraulis si e ritirât cun don Mario e nus àn lassâts ta chel biele oasi. Subit une muinie nus à puartât dai biscots e une bibite frescje, che le ven gjoldude sentàs tune bancje sot di une palme.
Une volte in strade, don Mario mi a dât une buine tirade di orelis, ce vevio fât !! invezi di bussà l’anel al monsignôr, al saludâlu i vevi dât in maniere democratiche la man, mi soi scusât disint che se mal vessin dît lu varès fat.

Risolte la mancjance di galateu da part mê, o sin tornâs a imbarcjâsi, e tor sere o sin partis viers un gnûf puart di destin, che al sarès stât Santos.

---

Ricuarts Furlans...di emigrazion, 11º.me pontade

2009-11-21T08:50:00.000-08:00

Río de Janeiro, ai 30 di Lui dal 1952

"Nossa Señora da Candelaria”

(Seconde part)
No pues lassà indaûr la visite che o vin fat ae Glesie di “Nossa Senhora da Candelaria”, situade te place Pio X, in plen centri de citât, la edificazion stîl neoclassic, costruide tal secul XVIII, la navade a forme di Crôs latine, sfodrade di marmui, e di vitreau colorats. Paraltri o pues dîus che no vevi mai viodût in vite mê tantis cjandelis impiadis, un vêr spetacul di lusôrs e di colôrs, tun cidinôr di religjositât di restâ sbarlufîts, fasintnus smenteâ i rumôrs de vite citadine.

O jerin in Invier cuntune biele zornade di soreli, purpûr a Rio al faseve cjalt, bastave viodi la int che leve vistude lizerine e in maniis di cjamese.

Don Mario i disè a mê mari che nus ufrive alc di bevi, o sin jentrâts intune “cafeteria”, par nô fruts al à domandât des bibitis, te butiliute al jere scrit “Pomona”, spiegantnus che al jere un struc di pomis e che il non al vignive di une Dee de mitologjie romane.

Ogni dì si imparave e si viodeve une gnove. Di gnûf o jerin in strade e tal mieç di dute chê int, dal trafic e dal pivetâ des machinis, joisus...ce cuantitât, mai o vevi viodude tante intune sol volte. Il predi nol parave di dînus: – stait atents, ocjo chi, ocjo là, cjapaitsi pe man, fasêt atenzion al bus….. –

---

Ricuarts Furlans...di emigrazion, 10º.me pontade

2009-11-14T03:26:00.000-08:00

Río de Janeiro, ai 30 di Lui dal 1952.

”La baie di Guanabara”

(Prime part)

A distance di tancj agns, o ai ancjemò denant i miei voi la vision de baie dal puart di Rio, no ai peraulis par descrivi tante belece naturâl, il blu de aghe dal mâr, il vert de vegjetazion tropicâl des montagnis, al jere come cjalà une biele cartuline, dulà che si viôt ancje la man da l’om.

Prin di dut cjalant adalt, un 700 metris cirche, sul dues parsore de montagne clamade “Corcovado”, si viôt il Crist Redentôr, che al à une altece di 38 metris, cheste e je la prime vision impuartânt, somearès che cui soi braçs ben vierts al volarès rivâ da par dut.

La seconde iconografie de citât si le cjate te jentrade de baie, e je la penisule di “Guanabara”, a son doi dues di altece scjalinade, la plui alte a le il “Pan de Azùcar” cui soi 575 metris , e plui in bas a cuote 220 si cjate il “Urca”, si po acedi a lis dôs cu la teleferiche, e di lassù il spetacul de citât al è maraveôs.

Un altri event mi a cjapât di sorprese, o cjaminavin pe citât, no bastavin i voi ni lis orelis par viodi ni par sintì, cun mio fradi o cjalavin partiere restants sbarlufîts, la cuantitât di spagnolets butats vie apene impiâts, o vin dit, forsit a ju dan gratis no ur costin nuie !!!!

E ca al vignì un altri confront cu la realtât che o vevi apene lassade daûr, o savevi di un sioret di Udin, che al leve a spas pe citât cuntune sô gnece, al jere simpri ben vistût in gringule, al veve ancje la baguline cuntune gusiele te ponte, cuant che la gnece (istruide) i diseve – nonno, fermati, ho visto una cicca !! - il nono al pontave i ocjai tal puest just, e zac, le impirave cu la gusiele, al tirave su la baguline, e la gnece le gjavave metintje vie te sô sachete, continuant a cjaminâ par vie Marcjât Vieri.

---

Ricuarts Furlans...di emigrazion, 9º.ne pontade

2009-11-07T04:11:00.000-08:00

In alte mâr, si continue dome cîl e aghe

(Seconde part)

Purtrop tal doman nus informin cun vôs grave e serie che, dute cheste fieste e sarès stade stratignude fin a gnûf avis, e jere muarte Eve Peron, la Siore dal Ecelentissim President de Nazion Argjentine. E jere sabide ai 26 dal mes di Lui dal 1952, tor vot e mieze di sere.

Dopo di vê sintût la notizie mi a parût che al jere calât un grant sipari sul davuelziment de vite su la nâf, lis autoritâts de stesse par dovê di cussience e vevin fermât dute la baldorie organizade, tancj di nô di sigûr no cognossevin cheste siore, o ai pensât che cence dubi e jere stade un personaç cetant impuartânt te vite di chest paîs, dulà che jo o sarès lât a vivi.

Ad ogni mût tal doman e àn fat la cerimonie dal “batisim di mâr”. E jere une biele zornade di soreli, un grum di int a jere te zone de pissine, dulà che si viodeve chest personaç mitologjic, siôr e paron dai mars, il clamât diu Netun, cun tant di corone sul cjâf, e cuntune forcje di trê dincj in man come simbul dal so podê reâl.

Formânt une file a jerin ducj i aspirants al batisim, un assegnât ae cerimonie cuntun grant pinel ju sporcjave di un colôr maron, e daspò un pâr volte e levin devant Netun, i vignive fate la domande di rît al dî di si il Diu ai deve un sburton e chest al colave dentri de pissine, une volte saltât fûr i consegnavin un atestât che al veve ricevût il “batisim di mâr”.

Cussì al leve passant il timp, fintremai che une buinore si scomençarin a viodi svolà i cocâi, segnâl che no jerin tant lontans, di fat tor sere in lontanance si viodè un fîl di tiere, nus vicinavin al continent, e al puart di Rio de Janeiro. O stevin rivânt in Americhe.

Jo cui voi sierâts fasint un pisul o jeri in spiete che da l’alt, il sentinele di vuardie da l’Augustus, un emuladôr di “Rodrigo de Triana”,che tal lontan 1492 val a dì 460 agns indaûr al berghelàs dal pal maiôr de Caravele “La Pinta”: - Tiere…tiere !!! -

---

Ricuarts Furlans...di emigrazion, 8º.ve pontade

2009-10-30T04:09:00.000-07:00

La grande traviersade. prime part

dal 23 al 29 di Lui dal 1952

Une setemane dome di cîl e mâr, lis zornadis di soreli a jerin cjaldis, l’astât lu varessin vût ancjemò pâr pôc, dopo passat l’ecuatôr lant viers il sud o levin incuintri al Invier.

Cumò o fevelarai di chestis zornadis cence meti pît in tiere, simpri al jere alc che sveave la tô curiositât, se no altri o vevin la novitât de pissine, in paîs no crôt di vei viodude une, no savevi nadâ, mi metevi dentri fin che o podevi tocjâ il fondâl cui piis.

O vevi ancje scuviert il mût di lâ inte prore, che si cjatave in prime classe, de tierce li che mi cjatavi o passavi pe seconde rivânt ae prime, o savevi cuai che a jerin i coridôrs e lis scjalis justis, une volte rivât te spice de nâf mi distiravi a cjapâ soreli, mi compagnavin di parsore il cîl e di sot il mâr, nissun rumôr uman, nome il sivilà da l’aiar e il moviment de nâf che someave une grande vuarzine che vierzeve un agâr, cheste volte no te tiere ma te aghe.

Une dì i vosadôrs nus disin che tra mieze ore e sarès passade a man çampe (par nô) une nâf che vignive da l’Argjentine lant viers l’Italie, vie di corse a cjapâ puest su la spuinde juste, di colp le viodin che si vicinave a une distance di mil metris (o calcolai), un sunâ di sirenis da part des dôs nâfs saludantsi, nô o svintulavin cui braçs in alt ce che o vevin a man, vosant a vôs in cuel - mandi, mandi, salude ducj lassù !! -

Ta chel moment ce incrosament di pinsîrs, la novitât di lâ, e forsit il desideri di tornâ indaûr. Parcè la vite nus metie cussì a prove? I miei gjenitôrs no mi domandarin, se o volevi lâ in Agjentine. ¿La Patrie Potestât?

Za da un pâr di dîs che nus visavin che stevin preparânt une grande fieste cuant che o varessin traviersât l’Ecuatôr, durant il dì il program al diseve che il diu Netun al dave il “batisim di mâr“ a cui che si sarès notât, cun tant di certificât firmât, podopo de cene “grant velion di bal” che al durave dute la gnot, cun mascarinis, coriandoi, trombetis e sivilots.

---

Ricuarts Furlans...di emigrazion, 7º.me pontade

2009-10-24T04:47:00.000-07:00

Dakar, Senegal ai 23 di Lui dal 1952

"Un cuartîr popolâr dentri de citât"

Dakar, une citât di grancj contrascj, il divari si lu viodeve in ducj i ordins, te architeture in ciertis zonis si viodevin grancj palaçs, e subit dopo un complès di barachis e capanis, lu stes tai vistìs de int, e jere la prime volte che o cjapavi contat cuntune realtât dal gjenar.

Sot sere in compagnie di pre Mario e un grup di passizîrs de nâf, o sin lâts a fâ un zîr pe citât, il predi nus à racomandât soredut ai plui zovins di no dimostrâ nissune maravee denant de int dal puest, e di no fâ osservazions di cualsisei gjenar, cun chest preambul o sin jentrâts intun viâl cun morârs une vorone alts di ca e di là, la iluminazion de strade e jere zale, colôr che al tirave dongje miârs di moscjins che si viodevin tor lis lampadinis.

La zone e jere plene di barachis e cuntun grum di int, su l’ôr de strade si viodeve dai gabiots metûts in file come chei che lì di nô si use par traspuartà polam al marcjât, dentri si viodeve dai alimentârs, binis di pan, des scjatulis, cualchi butilie, une vere e proprie buteghe di alimentârs, paîs che tu vâs, usancis che tu cjatis.

Biel tornânt al puart sin passàs devant di une cjase cui barcons vierts, cjalant dentri o vin viodût une grande sale cun tante int in zenoglon suntun tapêt, e cence scarpis tai pîts, ducj a cjalavin un nicjo te parêt, a mi parè che stessin preânt, pre Mario cjalantnus nus dîs : - su, su cidins, anin, anin svelts.-

Cjaminânt nus spiegave che a jerin musulmans e che al jere un puest di preiere par lôr, come che fos une glesie des nestris, cul lâ dal timp o ai savût che tal Senegal il novantedoi par cent a son musulmans “suniti”, di catolics a nd’je il sîs par cent.

Tornats su la nâf nus àn servît la cene, plui tart o sin lâts te “nestre” cjamarute, e vie pe gnot la nâf e partì, si sin das cont tal doman cuant che si jere bielzà in alte mâr.

Di ca indevant o varessin fat la grande traviersade, lassant daur di nô il continent neri, e daspò di sîs dîs dome di cîl e mâr ovin tocjât tiere in Americhe meridionâl.

---

Ricuarts Furlans...di emigrazion, 6º.te pontade

2009-10-17T04:54:00.000-07:00

Barcelone, Spagne ai 20 di Lui dal 1952

"Isabel e Fernando, i Rês catolics"

Biel tornânt ae nâf o vioderin un corteu di pipinots alts che a rapresentavin “Isabel de Castilla y Fernando de Aragon”, i regnants catolics cu la lôr cort.

I pipinots a jerin tant alts che a rivavin a meti il cjâf tai barcons dal prin plan, in man a vevin un lunc pal cuntune borsete tacade te ponte, come chês des nestris glesiis, cuant che il muini al passe tra i bancs cuntun argagn simil, par che tu i metis dentri cualchi franc, cui sa ce antighe usance tra i regnants e il popul a stevin rapresentant.

Pe ore di gustà o jerin bielzà parsore de nâf, o vevin passat une biele matinade e viodût un pôc di dut.

Tor sere o sin partîts viodint cemût che nus slontanavin di Barcelone viers un gnûf puart di destin. Sin passàs denant des isulis “Baleari” e bordânt la Spagne fin a passà il stret di Gjibraltar, a chest pont o lassavin indaûr il Mâr Mediterani par jentrà tal Ocean Atlantic.

A man çampe o vevin il Maroc e lis isulis “Canarie”, plui indevant la Mauritanie, man man che o passavin al larc di citâts impuartantis o nomenadis nus informavin pai vosadôrs. Finalmentri o saressin rivâts a Dakar, capitâl dal Senegal, situade te penisule di “Cabo Verde”, su la coste atlantiche Africane.

O vevin lassat a lis nestris spalis il vecjo continent par jentrà ta chel african, ce varessio mai viodût. !!!

---