Ricuarts Furlans...di emigrazion

Undecime pontade

RIO DE JANEIRO,

Ai 30 di Lui dal 1952

(Il bondinho = il tram)

(Seconde part)

E ca al vignì un altri confront cu la realtât co vevi apene lassade daûr, o savevi di un sioret di Udin, cal leve a spas pe citât cun tune so gnece e al jere simpri ben vistût in gringule, al veve ancje la baguline cun tune gusiele te ponte, cuant che la gnece (istruide su l’afâr) i diseve – nonno fermati ho visto una cicca !! il nono al pontave i ocjai tal puest just, e zac le impirave cu la gusiele, al tirave su la baguline, e la gnece le gjavave e je meteve vie te so sachete, e a continuavin a cjaminâ par vie Marcjatvieri.

No pues lassà indaûr la visite co vin fat a e Glesie di “Nuestra Señora de la Candelaria”, situade te place Pio X, in plen centri de citât, la costruzion in stîl neoclassic, costruide tal secul XVIII, la nâf e a forme di Crôs latine, l’interiôr sfodrant i soi rivistiments in marmui, i vitreau colorats .

Paraltri o pues dì che no vevi mai viodût tantis cjandelis impiadis in vite me, un vêr spetacul di lusôrs e di colôrs, tun siliînsi di religjositât di restâ sberlufîts, fasìnti smenteâ i rumôrs de vite citadine.

Apene fûr in strade, a jere une biele zornade di soreli e ancje se o jerin in unvier a Rio al faseve cjalt, bastave viodi la int cemût che leve vistude, e ce cuantitât, mai o vevi viodut tante int tune volte sole, il predi nol parave di dinus – stait atents chi, ocjo la,
cjapaisi pe man, atenzion al bus…..
------------------------------------------------------------------------
(Cheste conte a varà continuitât)

.................

Decime pontade

RIO DE JANEIRO …

ai 30 di Lui dal 1952.
(La baie di Guanabara)

(Prime part)


A distance di tancj agns o ai ancjemò denant i mei voi entrant cu la nâf la vision de baie dal puart di Rio, no ai peraulis par descrivi tante belece naturâl, mâr, montagnis, i colôrs , il blu de aghe, il vert de vegjetazion tropicâl, al jere come cjalà une biele cartuline, dulà che si viôt ancje la man da l’om.

Prin di dut cjalant in alt, un 700 metros cirche, sul duès parsore de montagne clamade “Corcovado”, si cjate il Crist Redentôr, ca la une alteçe di 38 metros, cheste a je la prime vision impuartânt, semearès che cui soi braçs ben vierts al vorès rivâ par dût.

La seconde iconografie de citât si cjate te jentrade de baie, a je la penisule di “Guanabara” , son doi duès di alteçe scjalinade, la plui alte a le il “Pan de Azùcar” cui soi 575 metros , e plui in bass a cuote 220 si cjate il “Urca”, si po acedi cu la teleferiche in dôs fermadis, e di lassù il spetacul de citât a le maraveôs.

Un’altre robe mi a fat stupî, don Mario a la volut fanus cognossi la citât, cussì che apene fûr dal puart o sin montâs su tun tram,

Ca al ven il mio stupôr, al jere cence puartis e nol veve sieraments nee di une bande nee di che altre, al veve un stafon lunc tant che il convoi, val a dì che cuant che tu jentravis za tu podevis sentâti te bancje che tu vevis sielte,

il Prelât al spiegà ca jere une cuistion di clime, come che li nol faseve mai frêt, al a volut dì, ca no coventavin puartis, jo o fasevi un parangon cul tram cal leve di Tarcint a Udin, l’uniche robe ca vevin in comun al jere il binari,

dut il rest a jere novitât, di lì indevant dut al sarès stât scuvierzi gnûfs costums e usancis.

Un altri event mi a cjapât di sorprese, o cjaminavin pe citât, no bastavin i voi ne lis orelis par viodi ne par sintì, cun mio fradi o cjalavin partiere restants sberlufîts, la cuantitât di spagnolets butats vie apene impiâts, o vin dit ,forsi a ju dan gratis no ur costin nuie !!!!

Ricuarts Furlans...di emigrazion

None pontade

IN ALTE MÂR

(Si continue dome cîl e mâr)

(seconde part)

Purtrop tal indoman a nus informin cun vôs grave e serie che, dute cheste fieste e sarès stade stratignude fin a un gnûf avis, a jere muarte Eve Peron, la Siore dal Ecelentissim President de Nazion Argjentine. E jere sabide ai 26 dal mes di Lui dal 1952, tor vot e mieze di sere.

Dopo vê sintût la notizie mi a parût cal jere calât un grant sipari sul davuelziment de vite su la nâf, lis autoritâts de stesse par dovê di cussience e vevin fermât dute la baldorie organizade, tancj di nô sicurementri no cognossevin cheste siore, o ai pensât che cence dubi di falà e jere stade un personaç cetant impuartânt te vite di chest paîs, dulà che jo o sarès lât a vivi.

Ad ogni mût tal doman e an fat la cerimonie dal “batisim di mâr”. E jere une biele zornade di soreli, un grum di int a jere te zone de pissine, dulà ca si viodeve chest personagjo mitologjic siôr e paron dai mars, il clamât diu Netun, cun tant di corone sul cjâf, e cun tune forcje di trê dincj in man come simbul dal so podè reâl.
Formânt une file a jerin ducj i aspirants al batisim, un adet ae cerimonie cun tun grant pinel ju sporcjave di un colôr maron, e dopo un a la volte e levin devant Netun, i vignive fate la domande di rît al dî di si il Diu i deve un sburton e chest al colave dentri de pissine, une volte saltât fûr i consegnavin un certificât cal atestave cal veve ricevût il “batisim di mâr”.

Cussì al leve passant il timp, fintremai che une buinore si scomençarin a viodi svolà i cocâi,( gabbiani ) segnal co jerin no tant lontans , di fat tor sere in lontanançe si podeve distingui un fîl di tiere, nus vicinavin al continent, e al puart di Rio de Janeiro. o stevin rivânt in americhe !!!

Jo cui voi sierâts fasint un pisul o jeri in spiete che da l’alt, il sentinele di vuardie da l’Augustus, un emuladôr di “Rodrigo de Triana”,che tal lontan 1492 val a dì 460 agns indaûr al berghelàs dal pal maiôr de Caravele “La Pinta”, Tiere…tiere….

Otave pontade

LA GRANDE TRAVIERSADE,

dal 23 al 29 di Lui 1952
(Dome cîl e mâr) (Prime part)

Une setemane nome di cîl e mâr, lis zornadis di soreli a jerin cjaldis, l’astât lu varessin vût ancjemò pâr un pôc, dopo passat l’ecuatôr lant viers il sud o levin incuintri al unvier.

Cumò o fevelarai di chestis zornadis cence meti pît in tiere, simpri al jere alc che sveave la to curiositât, se no le altri o vevin la novitât de pissine,( in paîs no crôt di vent viodude une) no le co savès nadà, mi metevi dentri fin le co podevi simpri tocjant il fondâl cui piis.

O vevi ancje scuviert il mût di la te prue, che si cjatave in prime classe, de tierce li che mi cjatavi o passavi pe seconde rivânt ae prime, o savevi cuai ca jerin i coredôrs e lis scjalis justis, une volte rivât te spice de nâf mi distiravi a cjapâ soreli, mi compagnavin di parsore il cîl e di sot il mâr, nissun rumôr uman, nome il sivilà da l’aiar e il moviment de nâf che semeave une grande vuarzine che vierzeve un agâr, cheste volte no te tiere ma te aghe.

Une dì i vosadôrs nus disin che tra mieç ore a sarès passade a man çampe (par nô) une nâf che vignive da l’Argjentine lant viers l’Italie, vie di corse a cjapâ puest su la spuinde juste, di colp le viodin che si vicinave a une distance di mil metros (o calcoli), un sunà di sirenis di part di dutis dôs saludantsi e svintulânt ce co vevin a man cui braçs in alt, vosant a vôs in cuel - mandi, mandi salude ducj lassù !!

Ta chel moment ce incrosament di pinsîrs, la novitât di la ,e forsit, il desideri di tornâ indaûr. Parcè la vite nus met a chei moments di prove? I miei gjenitôrs no mi vevin domandât ,so volevi la in Agjentine. ¿La Patrie Potestât?

Za da un pâr di dîs che nus visavin che stevin preparânt une grande fieste cuant co varessin traviersât l’Ecuatôr, durant il dì il programâ al diseve che il diu Netuno al dave il “ batisim di mâr “ a cui che si sarès notât, cun tant di certificât firmât, podopo de cene “grant velion di bal” cal durave dute la gnot, cun mascarinis, stelis filantti, coriandoi, trombetis e sivilots.

-----------------------------

se tus di la tô fasilu a : tallerdefurlan@fibertel.com.ar

Ricuarts Furlans...di emigrazion...

(Setime pontade)

DAKAR, ( Senegal )

ai 23 di Lui dal 1952

(Un cuartîr popolâr dentri de citât)


Dakar, une citât di grant contrast, il disvari si lu cjatave in ducj i ordins, te architeture in ciertis zonis si viodeve i grancj palaçs, e subit dopo un complès di barachis e capanis, lo stes tai vistìs de int, a jere la prime volte co cjapavi contat cun tune realtât dal gjenar.

Sot sere in compagnie di pre Mario e un grup di passizîrs de nâf sin las a fa un zîr pe citât, il predi nus a racomandât soredût ai plui zovins di no dimostrà nissune maravee devant de int dal puest, e di nò fa osservazions di cualsisei gjenar, cun chest preambul o sin jentrâts tun viâl cun morârs une vore alts di ca e di là, la inluminazion de strade e jere zale, colôr cal tirave dongje i miars di moscjins che si viodevin tor lis lampadinis .

La zone a jere plene di barachis e cun tun grum di int, su l’ôr de strade si viodeve dai gabiots mitûs in file come chei che lì di nô si use par traspuartà polam al marcjât, dentri si viodeve dai alimentârs, binis di pan, scjatolams, cualchi butilie, une vere e propie buteghe di alimentârs, paîs che tu vâs, usance che tu cjatis.

Biel tornânt al puart sin passàs devant di une cjase cui barcons viers, cjalant dentri vin viodût une grande sale cun tante int in zenoglon su tun tapêt sul paviment, e cence scarpis tai piis, ducj a cjalavin un nicjo te parêt, a mi a parût che stessin preânt, pre Mario cjalantnus nus dîs : - su, su cidins, anin, anin svelts.

Cjaminânt nûs spiegave che a jerin musulmans e cal jere un puest di prejere par lôr, come nô o levin tune glesie ,cul la dal timp o ai savût che tal Senegal il novantedoi par cent a son musulmans suniti, catolics il sîs par cent.

Tornats su la nâf nûs an servit la cene, plui tart sin las te “nestre” cjamarute, e vie pe gnot sin partîs, si sin das cont tal indoman cuant che si jere bielza in alte mar.

Di ca indevant o varessin fat la grande traviersade, lassant daur di nô ( par la oltri simpri si scuen lassa alc daur, a le inevitabil) il continent neri, e daspò di sîs diis dome di cil e mar vin tocjât tiere in Americhe meridionâl.
------------------------------

Ricuarts Furlans...di emigrazion...

LA SACRE FAMEE.

BARCELONE ( Spagne)

ai 20 di Lui dal 1952

(Seste pontade)

Biel tornânt ae nâf o vin viodût un corteu di pipinots alts che rapresentavin a “Isabel I de Castilla e Fernando II de Aragon” i regnants catolics cu la lôr cort.

I pipinots a erin tant alts che rivavin a meti il cjâf tai barcons dal prin plan, in man a vevin un lunc pal cun tune borsete tacade te ponte, valadì come tes nestris glesiis cuant che il muini al passe tra I bancs cun tun argagn simil, par che tu i metis dentri cualchi franc, cui sa ce antighe usance tra i regnants e il popul a stevin rapresentant.

Pe ore di gustà o erin bielzà parsore de nâf, o vevin passat une biele matinade e viodût un pôc di dut.

Tor sere sin partîts viodint cemût che si slontanavin di Barcelone viers un gnûf puart di destin, sin passàs denant des isulis “Baleari” e bordânt la Spagne fin a passà il stret di Gjibiltere, a chest pont o lassavin indaûr il mâr mediterani par jentrà tal ocean atlantic, lassant a lis nestris spalis il vecjo continent, par jentrà tal african.

A man çampe o vevin il Maroc, e lis isulis Canarie plui indevant la Mauritanie, man man co passavin al larc di citâts impuartantis o nomenadis nus informavin pai vosadôrs, finalmentri saressin rivats a Dakar, capitâl dal Senegal, situade te penisule di “Cabo Verde”, su la coste atlantiche Africane.

O vevin lassat a lis nestris spalis il vecjo continent par jentrà ta chel African, ce varessio mai viodût. !!!

Cheste conte a vará continuitât.

------------------

Ricuarts Furlans...di emigrazion...

La Catedral Gotiche

(Cuinte pontade)

BARCELONE (Spagne)

domenie ai 20 di Lui dal 1952

----------------------


Domenie ai 20 di Lui, di matine dopo vê fat gulizion,sin las sul puint,e a si nus presente denant i voi il panorame di Barcelone (Spagne).

Me mari restade dacuardi cun Pre Mario la sere prin, che nus varès fat cognossi la citât, di fat cussì a le stât come prometût, o scomençavi a cognossi il mont, e a sinti che chest viaç mi varès fat viodi robis gnovis, a son pasas cuasi sessante ains di cheste storie, co sint cumò il bisugn di contale, al restarà indaûr cualchi detai forsi, ma la essence mi e restade tal çurviel e tal cûr.

Jessûts dal puart, vin cjapât par stradis stretis dal cuartîr Gotic, al jere tant ce viodi, ancje il sintì a fevelà tune lenghe diferente a e tô a jere une novitât.

Rivâts tune grande place chê de Catedrâl Gotiche, imponente e severe al pont di fati sinti tant piçul, par fortune no si viodeve tante int, forsi al jere masse adore, o cirivi di no pierdi di viste al Don e di no restà indaûr. Jentrâts te Catedrâl luminade dome cun tantis cjandelis, e faseve impressión il scûr e il cidinôr, plene di altârs, statuis, cuadris cal semeave un museu.

E par dut si viodeve dai cartei scrits in Spagnûl che disevin “Cuide su cartera”, come che no capivi i domandi a Pre Mario – ce vuelino di, !!! di sta atents che no ti robin la borsete !!!
Fat un zîr dentri la glesie, ditis cuatri -pater- ave -glorie, jessûts in strade , o soi restât inceât dal soreli di une splendide zornade , dal mediterani Spagnûl dal mes di Lui.
--------------------------------------------------------------------------

(Cheste conte a varà continuitât)